पुणे : व्यावसायिक केतन अग्रवाल यांच्या मृत्यू प्रकरणाच्या तपासात धक्कादायक माहिती समोर आल्याचा दावा पुणे ग्रामीण पोलिसांनी केला आहे. २०२५ मध्ये चर्चेत आलेल्या ‘ऑपरेशन हनिमून’ प्रकरणाची माहिती आणि खुनाच्या घटनांवर आधारित चित्रपट पाहिल्यानंतर केतनला लोहगडावरील दरीत ढकलून ठार मारण्याचा कथित कट रचण्यात आल्याचे आरोपपत्रात नमूद करण्यात आले आहे.
पोलिसांच्या तपासानुसार, केतनची नियोजित वधू सिया गोयल, तिचा कथित प्रियकर चेतन चौधरी आणि चेतनचा मित्र रितेश हंगे यांनी ‘माही’ नावाचे बनावट समाजमाध्यम खाते तयार केले होते. या खात्यावरून केतनशी संवाद साधताना ‘माही’ ही सियाची मैत्रीण असल्याचे भासवण्यात आल्याचा आरोप आहे. सियाचा वाढदिवस सरप्राइज पद्धतीने साजरा करण्याच्या बहाण्याने केतनला लोहगडावर बोलावण्यात आले आणि त्यानंतर कथित कटाची अंमलबजावणी करण्यात आल्याचे पोलिसांनी आरोपपत्रात म्हटले आहे.
केतन अग्रवाल यांचा १८ जून रोजी लोहगडावरून दरीत पडून मृत्यू झाला होता. सुरुवातीला ही घटना अपघाती असल्याचे मानले जात होते. मात्र, पुढील तपासात हा अपघात नसून खून असल्याचा दावा पोलिसांनी केला. या प्रकरणी सिया (वय २०), चेतन (वय २२) आणि रितेश हंगे यांना अटक करण्यात आली आहे. तिघेही सध्या न्यायालयीन कोठडीत आहेत.
शनिवारी (ता. १९) वडगाव मावळ न्यायालयात पोलिसांनी ५ हजार ५३ पानी आरोपपत्र दाखल केले. पुणे ग्रामीणचे पोलीस अधीक्षक संदीपसिंग गिल यांच्या नेतृत्वाखाली डिजिटल, सायबर आणि फॉरेन्सिक पुराव्यांच्या आधारे तपास करण्यात आल्याचे पोलिसांनी सांगितले.
आरोपपत्रानुसार, आरोपींनी केतनचा खून करण्यासाठी २१ मे रोजी लोणावळ्यातील टायगर पॉइंटसह विविध दऱ्या-खोऱ्यांची पाहणी केली होती. मार्च २०२५ मध्ये लोहगडावरून पडून २१ वर्षीय तरुणीचा मृत्यू झाल्याची माहितीही इंटरनेटवर शोधल्याचे पोलिसांचे म्हणणे आहे. त्यानंतर १४ जून रोजी दोघे पुन्हा लोहगडावर गेले असता सियाने केतनला दरीत ढकलण्याचा कथित प्रयत्न केल्याचे आरोपपत्रात नमूद आहे. या प्रकरणातील आरोप न्यायालयात सिद्ध होणे बाकी आहे.
