पिपरी : पिंपरी-चिंचवड येथील वडमुखवाडी येथे एक धक्कादायक प्रकार घडला आहे. तुझ्या बापाकडून संपत्तीत तुझा हिस्सा माग म्हणत विवाहितेचा छळ करण्यात आला आहे. या छळाला कंटाळून अखेर विवाहितेने टोकाचं पाऊल उचलत गळफास घेऊन आत्महत्या केली आहे. ही घटना ६ मार्च रोजी वडमुखवाडी येथे घडली आहे.
याप्रकरणी महिलेने दिघी पोलीस ठाण्यात ७ मार्च ला फिर्याद दिली आहे. त्यावरून पती प्रसाद बाळासाहेब वीर (वय २९ रा. वडमुखवाडी), दोन महिला आरोपी, सासरे बाळासाहेब नानासाहेब वीर( रा. आष्टी बीड) यांच्यावर गुन्हा दाखल करण्यात आ ला आहे.
पोलिसांनी दिलेल्या अधिक माहितीनुसार, पीडितेचा २४ फेब्रुवारी २०२२ साली आरोपीशी विवाह झाला होता. मात्र मागील ५ ते ६ महिन्यांपासून आरोपी हे पिडीतेला तू मुलगी आहेस तुझा वडिलांच्या संपत्तीवर हक्क आहे. तू जमिनीतील वाटा माग म्हणत वेळोवेळी भांडणे केली.
त्यानंतर किरकोळ कारणावरून पिडीतेचा शारीरिक आणि मानसिक छळ केला. यातून पोलिसात तक्रार केली तर धमकी दिली. या जाचाला कंटाळून पीडितेने अखेर राहत्या घरात ओढणीने गळफास घेत आत्महत्या केली. यावरून दिघी पोलिसांनी गुन्हा दाखल केला असून पोलीस पुढील तपास करत आहेत.
