पिंपरी : चिंचवड विधानसभा मतदारसंघातून कोणत्याही परिस्थितीत निवडणूक लढवणार, असा निर्धार केलेले नेते नाना काटे यांनी अखेर विधानसभा निवडणुकीतून माघार घेतली आहे. त्यामुळे चिंचवडमधील महायुतीसह महाविकास आघाडीच्या उमेदवारांना मोठा दिलासा मिळाला आहे. नाना काटे यांनी शंकर जगताप यांना पाठिंबा दिला आहे.
चिंचवड विधानसभा मतदारसंघातून महायुतीचे बंडखोर नेते अजित पवारांचे निकटवर्तीय नाना काटे यांनी उमेदवारी अर्ज मागे घेतला आहे. नाना काटे यांना काही दिवसांपूर्वीच उपमुख्यमंत्री अजित पवार यांनी भेट घेऊन बंडखोरी शमवण्याचा प्रयत्न केला होता. तसेच महाविकास आघाडीचे नेते शरद पवार यांनी देखील नाना काटे यांच्याशी संपर्क साधून उमेदवारी मागे घेण्याबाबत चर्चा केली होती. याबाबत स्वतः नाना काटे यांनी माहिती दिली.
तसेच आज उमेदवारी अर्ज मागे घेण्याचा शेवटचा दिवस असल्याने महायुतीचे अधिकृत उमेदवार शंकर जगताप यांनी देखील नाना काटे यांची भेट घेतली. अखेर माजी नगरसेवकांसोबत नाना काटे यांनी बैठक घेऊन निवडणुकीतून माघार घेत असल्याचं स्पष्ट केल आहे. त्यामुळे शरद पवार गटाचे राहुल कलाटे विरुद्ध भाजपचे शंकर जगताप अशी थेट लढत होणार आहे.
चिंचवडमध्ये भाजपने शंकर जगतापांना उमेदवारी दिली आहे. राष्ट्रवादी काँग्रेस (शरद पवार) पक्षाकडून उमेदवारी मिळावी यासाठी प्रयत्न करत असलेले नाना काटे यांना उमेदवारी मिळाली नव्हती. उमेदवारी न मिळाल्यामुळे नाना काटे यांनी अखेर अपक्ष लढण्याचं जाहीर केलं होतं.आज सकाळपासूनच नाना काटे हे निवडणूक लढण्यावर ठाम होते. मात्र, दुसरीकडे अजित पवार यांचा निर्णय हा अंतिम असल्याचे देखील नाना काटे यांनी म्हटलं होतं. त्यामुळे नाना काटे ही निवडणूक लढणार का? याकडे सगळ्यांचे लक्ष लागल होतं.
