Pimpri-Chinchwad Tathawade Land Scam : पिंपरी-चिंचवड शहरातील डांगे चौकाजवळील ताथवडे परिसरातील पशुसंवर्धन विभागाच्या मालकीची तब्बल 15 एकर (सुमारे 6.32 हेक्टर) शासकीय जमीन परस्पर विकल्याचे प्रकरण समोर आले आहे. आता या प्रकरणी एकूण 26 जणांविरोधात दापोडी पोलीस ठाण्यात गुन्हा दाखल करण्यात आलेला आहे. (Pune Latest Tathawade Land Scam)
या प्रकरणात, मूळ मालक मयत हेरंब यांच्या भूखंडाची पडद्याआड विक्री करणारे एकूण 23 वारसदार आरोपींचा यात समावेश आहेत. त्यांच्यासोबत जमीन खरेदी करणारे कपिल छोटं फकीर, सय्यद फैयाज मीर आजीमोददीन आणि सह दुय्यम निबंधक विद्या बडे यांचाही आरोपींमध्ये समावेश आहे.
काय आहे प्रकरण?
शहरातील ताथवडे परिसरातील सर्व्हे नंबर 20 मधील 6.32 हेक्टर जमीन ही कायदेशीररित्या शासकीय पशु पैदास प्रक्षेत्र, ताथवडे यांच्या ताब्यात आहे. तसेच, या भूखंडाची खरेदी-विक्री शासकीय पूर्व परवानगीशिवाय करू नये, असे स्पष्ट आदेश असतानाही आरोपींनी स्वतःच्या आर्थिक लाभासाठी संगनमत केले आहे.
या सर्व आरोपींनी शासनाची फसवणूक करण्याच्या हेतूने, शासनाच्या ताब्यात असलेली मालमत्ता हडपण्यासाठी, कालबाह्य 7/12 उतारा वापरला आणि ई-म्युटेशन (फेरफार) प्रक्रिया टाळून अवैध दस्तऐवजांची नोंदणी करण्यात आली आहे. हा प्रकार शासनाच्या पूर्वपरवानगीशिवाय शासकीय मालमत्ता गिळंकृत करण्याचा प्रयत्न केल्यामुळे या प्रकरणातील 26 जणांवर अखेर गुन्हा नोदवण्यात आला आहे. या प्रकरणी आणखी सखोल तपास सुरू आहे.
