पुणे: पुण्याची आता ‘विषारी हवेचे शहर’ अशी नवी ओळख निर्माण होत आहे. पुणे आणि पिंपरी-चिंचवडच्या हवेत दर तासाला तब्बल 6 टन सिमेंटचे सूक्ष्म कण मिसळले जात असल्याची धक्कादायक माहिती समोर आली आहे. विकासाच्या नावाखाली सुरू असलेले काम थेट पुणेकरांच्या आरोग्यावर परिणाम करत आहेत.
पुणे आणि पिंपरी-चिंचवडमध्ये सध्या 502 अधिकृत रेडी मिक्स काँक्रीट (RMC) प्लांट सुरू आहेत. मात्र, खरी भीती अनधिकृत प्लांटची आहे, ज्यांची संख्या 175 च्या वर आहे. आकडेवारीनुसार, एक प्लांट वर्षाला 100 टन धुलिकण हवेत सोडतो. वडगाव, हडपसर, वाकड, खराडी आणि हिंजवडी यांसारखे आयटी आणि निवासी भाग आता या प्रदूषणाचे ‘हॉटस्पॉट’ बनले आहेत. नियमानुसार हे प्लांट वस्तीपासून 200 मीटर लांब हवेत, पण पुण्यात हे नियम फक्त कागदावरच उरले आहेत.
हे केवळ हवेतील प्रदूषण नाही, तर हे एक प्रकारचे संथ विष आहे. सिमेंटमधील सिलिका फुफ्फुसांमध्ये साचून ‘सिलिकॉसिस’सारखा असाध्य आजार आणि कर्करोगाला निमंत्रण देत आहे. कॅल्शियम आणि ॲल्युमिनियम ऑक्साईडमुळे डोळ्यांची जळजळ आणि दम्याचे तीव्र झटके येण्याचे प्रमाण वाढले आहे. विशेषतः लहान मुले आणि ज्येष्ठांसाठी ही हवा जीवघेणी ठरत आहेत.
विकास हवाच, पण तो मानवी जीवनाच्या मुळावर उठणारा नसावा. प्रशासन आणि राज्यकर्त्यांनी तातडीने कठोर धोरण आखले नाही, तर पुण्याची ओळख लवकरच ‘रुग्णालयांचे शहर’ म्हणून होईल.
