Election : पिंपरी-चिंचवड महापालिका निवडणुकीच्या पार्श्वभूमीवर प्रभाग क्रमांक 1 मध्ये एक वाद निर्माण झाला आहे. राष्ट्रवादी काँग्रेसचे उमेदवार विकास साने यांनी उमेदवारी अर्ज भरताना दिलेल्या शपथपत्रात त्यांच्याकडे असलेल्या रिव्हॉल्व्हरची माहिती नमूद केली नाही, असा आरोप विरोधकांकडून करण्यात आला आहे.
निवडणूक नियमांनुसार कोणत्याही उमेदवाराकडे शस्त्र असेल, तर त्याची माहिती शपथपत्रात देणं बंधनकारक असतं. मात्र ही माहिती लपवण्यात आली असल्याचा दावा विरोधी उमेदवारांनी केला आहे. याबाबत त्यांनी निवडणूक अधिकाऱ्यांकडे अधिकृत आक्षेपही नोंदवला आहे.
विशेष म्हणजे उमेदवारी अर्जाची छाननी होत असताना संबंधित अधिकाऱ्यांनीही या बाबीकडे लक्ष दिलं नाही, यामुळे संशय अधिक गडद झाला आहे. ही चूक मुद्दाम दुर्लक्षामुळे झाली की केवळ प्रशासकीय त्रुटी आहे, याबाबत आता चर्चा सुरू झाली आहे.
या प्रकरणामुळे विरोधक चांगलेच आक्रमक झाले असून, न्यायालयात दाद मागण्याची तयारी सुरू असल्याची माहिती सूत्रांकडून मिळते आहे. त्यामुळे निवडणूक प्रक्रियेतील पारदर्शकतेवरही प्रश्नचिन्ह उपस्थित केलं जात आहे.
या वादामुळे प्रभाग क्रमांक 1 मधील राजकीय वातावरण तापलं असून, जर हे प्रकरण न्यायालयात गेलं तर विकास साने यांच्या उमेदवारीचं भवितव्य न्यायालयाच्या निर्णयावर अवलंबून राहणार आहे.
