Crime : पिंपरी-चिंचवड शहरातील दिघी परिसरात सार्वजनिक ठिकाणी उभे राहून वाटसरूंना अश्लील इशारे करणाऱ्या महिलेवर गुन्हा दाखल करण्यात आला आहे. या महिलेचं वय ४३ वर्ष असूव ती वेश्या व्यवसाय करते. ही कारवाई 24 फेब्रुवारी रोजी सायंकाळी सुमारे 5.30 वाजता आळंदी रोडवर करण्यात आली. गेल्या काही दिवसांपासून या भागातील नागरिकांकडून वारंवार तक्रारी येत होत्या की, काही महिला रस्त्यावर उभ्या राहून जाणाऱ्यांना अडवतात, खुणावतात आणि त्यामुळे वाहतुकीलाही अडथळा निर्माण होतो.
आळंदी रोड हा दिघी-चऱ्होली भागाला जोडणारा महत्त्वाचा मार्ग आहे. या रस्त्यावरून दररोज हजारो नागरिकांची ये-जा असते. वारकरी, कामगार, विद्यार्थी आणि व्यावसायिक अशी विविध स्तरातील लोकांची वर्दळ येथे कायम असते. त्यामुळे सार्वजनिक ठिकाणी अशा प्रकारचे प्रकार घडू लागल्याने स्थानिकांमध्ये अस्वस्थता वाढली होती. विशेषतः सायंकाळच्या वेळी महिलांना आणि कुटुंबांसह प्रवास करणाऱ्यांना गैरसोय होत असल्याची तक्रार होती.
तक्रारींची दखल घेत पोलिसांच्या अनैतिक मानवी वाहतूक प्रतिबंधक पथकाने परिसरात पाहणी केली. त्यावेळी संबंधित महिला रस्त्यावरून जाणाऱ्या नागरिकांना अश्लील हावभाव करून थांबवत असल्याचे आढळले. यानंतर तिच्यावर भारतीय न्याय संहितेअंतर्गत कारवाई करण्यात आली.
