बारामती, (पुणे) : एक सुसंस्कृत राजकारणी म्हणून यशवंतरावजी चव्हाण साहेबांची ओळख आहे. त्यामुळे यशवंतराव चव्हाण यांच्या आदर्शावरच राष्ट्रवादी काँग्रेसची भविष्यातील वाटचाल सुरु ठेवण्याचा धोरणात्मक निर्णय राष्ट्रवादी काँग्रेस पक्षाने घेतला आहे. या पुढील काळात पक्षाच्या प्रत्येक फलक, बॅनर, होर्डिंग्ज, जाहिराती, प्रचार साहित्यावर यशवंतराव चव्हाण यांचा प्रदेश कार्यालयाने निश्चित केलेला फोटो छापण्याचे निर्देश प्रदेशाध्यक्ष सुनिल तटकरे यांनी दिले आहेत. याबाबतची माहिती प्रदेशाध्यक्ष सुनिल तटकरे यांनी एका पत्राद्वारे दिली आहे.
काय म्हंटल आहे पत्रात?
महाराष्ट्राचे शिल्पकार आदरणीय यशवंतरावजी चव्हाण साहेब हे श्री. अजितदादा पवार यांच्या नेतृत्वाखाली राष्ट्रवादी काँग्रेस पक्षाचे प्रेरणास्थान आहे, आदर्श आहे.
एक सुसंस्कृत राजकारणी म्हणून यशवंतरावजी चव्हाण साहेबांची ओळख आहे. उत्तम लेखक आणि साहित्यिक म्हणून त्यांचे साहित्य क्षेत्रातील योगदान महत्त्वाचे आहे. उत्तम राजकारणी, लोकशाहीवादाचे खंदे समर्थक, समता-बंधुता आणि एकता या त्रीसुत्रांचे पाईक असणारे यशवंतरावजी चव्हाण साहेब म्हणजे आपल्या पक्षाची आणि प्रत्येक कार्यकर्त्याची प्रेरणा व ऊर्जा आहे.
माननीय यशवंतरावजी चव्हाण साहेब यांच्या आदर्शावरच राष्ट्रवादी काँग्रेसची भविष्यातील वाटचाल राहणार आहे. त्यामुळे पक्षाच्या प्रत्येक फलक, बॅनर, होर्डिंग्ज, जाहिराती, प्रचार साहित्यांवर यशवंतरावजी चव्हाण साहेबांचा प्रदेश कार्यालयाने निश्चित केलेला फोटो ठळकपणे छापण्यात यावा. असे आदेश राष्ट्रवादी काँग्रेस पक्षाचे प्रदेशाध्यक्ष सुनिल तटकरे यांनी पत्राद्वारे दिले आहेत.
