पुणे : पुणे जिल्ह्यातील शिरूर तालुक्यातील रांजणगाव गणपती परिसरात एका महिलेबरोबरच २ बालकांचे मृतदेह अर्धवट जळलेल्या अवस्थेत आढळून आले होते. त्यानंतर पोलिसांनी तात्काळ तपासाला सुरुवात केली, मात्र अद्यापही या मृतदेहांची ओळख पटली नसल्यामुळे रांजणगाव पोलिसांकडून मृत महिला आणि मुलांचे स्केच तयार करून ते प्रसिद्ध करण्यात आले आहेत.
नेमकी घटना काय घडली?
शिरूर तालुक्यातील खंडाळा माथ्याजवळ रांजणगावच्या हद्दीत आर.के हॉटेलच्या पाठीमागे एक महिला आणि तिच्या २ लहान मुलांचे मृतदेह अर्धवट जाळालेल्या अवस्थेत आढळून आले होते. अज्ञात इसमाने खून करून जाळल्याचा प्राथमिक संशय पोलिसांना आहे. मृत महिलेचे वय अंदाजे २५ ते ३० वर्षे असून तिच्या दोन्ही मुलांपैकी एकाचे वय अंदाजे दिड वर्षे तर दुसऱ्याचे ४ वर्षे इतके आहे. रांजणगाव पोलिसांच्या हाती घटनास्थळावरून काही पुरावे लागले असून या निर्घृण हत्याकांडामागील आरोपीचा शोध घेण्यासाठी पोलीस प्रयत्न करत आहेत.
याच्या आधारावर शोध…
सदर प्रकरणातील मृतदेहांचे चेहरे जळलेले असल्यामुळे ओळख पटवणे आव्हानात्मक आहे. मात्र महिलेच्या गळ्यात मंगळसूत्र, हातावर जयभीम असे गोंदलेलं असून उजव्या हाताच्या मनगटावर बदाम आणि Mom, Dad असे इंग्रजीत गोंदलेले आहे.
पुणे ग्रामीणचे पोलीस अधीक्षक संदीपसिंह गिल यांनी रांजणगाव एमआयडीसी पोलीस स्टेशनला भेट देऊन तपासाची चक्रे फिरवली आहेत. मृतदेहांची अद्यापही ओळख पटवण्यात पोलिसांना यश आलेले नाही. यासाठी आता स्थानिक यंत्रणांच्या मदतीसह मृत महिला आणि मुलांचे स्केच तयार करून ते प्रसिद्ध करण्यात आले आहेत.
याबाबत अधिक तपास रांजणगाव पोलीस स्टेशनचे पोलीस निरीक्षक वाघमोडे यांच्या मार्गदर्शनाखाली सुरु आहे.
