पुणे : हिंगणे खुर्द परिसरात अल्पवयीन मुलीसमोर एका तरुणाने अश्लील कृत्य करून तिचा विनयभंग केल्याची घटना घडली. तरुणावर पोक्सो कायद्यांतर्गत गुन्हा दाखल करण्यात आला आहे. सिंहगड रोड पोलिसांनी त्याला अटक केली आहे. रोशन सिंग (१९, रा. आनंद विहार, हिंगणे खु. पुणे) असे आरोपीचे नाव आहे.
पीडित मुलगी मामीच्या घरी जात असताना हा प्रकार घडला. याबाबत पीडित मुलीच्या आईने सिंहगड रोड पोलीस ठाण्यात फिर्याद दिली. यावरून पोलिसांनी रोशन सिंग याच्यावर पोक्सो ॲक्टनुसार गुन्हा दाखल करून अटक केली आहे.
नेमक काय घडल?
फिर्यादी यांची १२ वर्षांची मुलगी त्यांच्या घराजवळ राहणाऱ्या मामीकडे एकटीच जात होती. आनंद विहार फेज २ येथील संगीता सुपर मार्केटजवळ आरोपी रोशन सिंग याने फिर्यादी यांच्या मुलीकडे पाहून अश्लील हातवारे केले. एवढ्यावरच न थांबता त्याने अनेक वेळ मुलीचा पाठलाग करून त्रास दिला. हा प्रकार काही दिवसांनी पीडित मुलीने अखेर आईला सांगितला. त्यानंतर त्यांनी सिंहगड रोड पोलिस ठाण्यात फिर्याद दिली. पोलिसांनी आरोपीवर विनयभंग व पोक्सो ॲक्टनुसार गुन्हा दाखल करून अटक केली. या प्रकरणाचा पुढील तपास पोलिस उपनिरीक्षक लोहार करत आहेत.
