कुरकुंभ : पुणे-सोलापूर राष्ट्रीय महामार्गावर दौंड तालुक्यातील मळद येथे भीषण अपघात झाल्याची घटना घडली आहे. भरधाव वेगात येणाऱ्या लक्झरी बसणे रस्ता ओलांडणाऱ्या दुचाकीला पाठीमागून जोरदार धडक दिली. या अपघातात दुचाकीवरील पती- पत्नी दोघेही जागीच ठार झाले. ही घटना रविवारी (ता. २७) सकाळी दहा वाजण्याच्या सुमारास घडली. मळद येथील गंगाधर यादव व त्यांची पत्नी सुमन यादव असे अपघातात मृत्यू झालेल्या दाम्पत्याचे नाव आहे.
याबाबत अधिक माहिती अशी की, यादव दाम्पत्य पुणे-सोलापूर राष्ट्रीय महामार्गांवरून जात असताना घागरेवस्ती जवळील दुभाजकाच्या ठिकाणी रस्ता ओलांडत होते. त्यावेळी पाठीमागून सोलापूर बाजूकडून येणाऱ्या लक्झरी बसने जोरात धडक दिली. या धडकेत गंगाधर यादव व त्यांची पत्नी सुमन यादव हे गंभीर जखमी झाल्याने त्यांचा जागीच मृत्यू झाला.
यादव कुटुंब हे मुळचे खानदेशातील आहेत. गेल्या काही वर्षांपासून मळद येथे स्थायिक झाले आहेत. अपघातात मृत्यू झालेल्या सुमन यादव या दौंड पंचायत समिती माजी सदस्य बबनराव रणवरे यांच्या भगिनी तर गंगाधर यादव हे दाजी होत.
