लोणी काळभोर : विद्यार्थ्यांच्या घराचा दरवाजा उघडा असल्याची संधी साधून अज्ञात चोरट्याने प्रवेश करून रुमधील चार लॅपटॉप व मोबाईल चोरून नेल्याची घटना घडली आहे. ही घटना कदमवाकवस्ती (ता. हवेली) ग्रामपंचायत हद्दीतील एमआयटी परिसरात शनिवारी (ता.2) सकाळच्या सुमारास घडली आहे. या तीन घटनेमध्ये चोरटयाने 2 लाख 14 हजारांचा मुद्देमाल लंपास केला आहे.
याप्रकरणी प्रथमेश अनिल चव्हाण (वय-20, सध्या रा. डी/904 फोर अॅव्हेन्यु, कदमवाकवस्ती, ता.हवेली, जि. पुणे. मुळ रा. जि. अकोला), अथर्व ओमप्रकाश कारभारी (वय 20, डी/1104 फोर अॅव्हेन्यु, कदमवाकवस्ती, ता. हवेली, जि.पुणे, मुळ रा. वाकड जि.पुणे) व स्वप्निल संजय कुलकर्णी (वय 20, सध्या रा. फ्लॅट नं. 1, चिंतामणी पार्क सोसायटी, अर्थव रेसिडन्सी, एम. आय.टी कॉलेज जवळ, कदमवाकवस्ती, ता. हवेली, जि.पुणे. मुळ रा. जि. नाशिक) यांनी लोणी काळभोर पोलीस ठाण्यात फिर्याद दिली आहे. त्यानुसार अज्ञात चोरट्याच्या विरोधात भारतीय न्याय संहीता 2023 चे कलम 305 अमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, वरील तिन्ही मुले लोणी काळभोर (ता. हवेली) येथील एका शैक्षणिक संकुलात शिक्षण घेत आहेत. तर शिक्षण संकुलाच्या जवळच असलेल्या इमारतींमध्ये फ्लॅट घेऊन भाडेतत्वावर राहतात. तिन्ही घटनेत मुलांचा दरवाजा उघडा असल्याने चोरट्याने हात साफ केला आहे.
चोरट्याने प्रथमेश चव्हाण याचा 56 हजार 500 रुपयांचा लॅपटॉप, अथर्व कारभारी यांचा 50 हजार रुपयांचा लॅपटॉप चोरून नेला. तर स्वप्निल कुलकर्णी याच्या फ्लॅटमधून 45 हजार व 15 हजार 500 रुपये किंमतीचे दोन लॅपटॉप, 40 हजार रुपयांचा अॅपल व 7 हजार रुपये किंमतीचा विवो कंपनीचा मोबाईल चोरून नेला आहे. या तीन गुन्ह्यांमध्ये 2 लाख 14 हजारांचा मुद्देमाल चोरी झाला आहे. पुढील तपास लोणी काळभोर पोलीस करीत आहेत.
