शेतातील विद्युत रोहीत्रांमधील तांब्याच्या तारा चोरी करणारी टोळी जेरबंद

योगेश शेंडगे
शिक्रापूर: शिक्रापुर पोलीस स्टेशन हद्दीमध्ये शेतातील विद्युत रोहीत्रांमधील तांब्याच्या तारा चोरीच्या गुन्ह्यांमध्ये मागील ३ महीन्यांमध्ये वाढ झाली होती. विद्युत रोहीत्र चोरीमुळे शेतकऱ्यांची पाण्याविना पिके जळुन जाऊन मोठे आर्थिक नुकसान होत होते. या चोरांचा शोध घेवुन विद्युत रोहीत्र चोरीला आळा घालण्याचे मोठे आव्हान शिक्रापूर पोलीसांपुढे होते.

शिक्रापुर पोलीस स्टेशनचे गुन्हे शोध पथकातील पोलीस अधिकारी व अंमलदार यांनी विद्युत रोहीत्र चोरींच्या गुन्ह्यांचा सखोल तपास तसेच सीसीटीव्ही फुटेजद्वारे आरोपींचा शोध घेऊन आरोपींची माहीती काढली. त्यानंतर सागर शिवराम जाधव (वय ३० वर्षे, रा. म्हाळुंगे पडवळ, ता.आंबेगाव, जि.पुणे), राजु प्रभु पारधी, (वय ४० वर्षे, रा. जवळके बु।। ता. खेड, जि.पुणे), राहुल संतोष मधे, (वय २५ वर्षे, रा. कडाळवाडी, नारायणगाव, ता. जुन्नर, जि.पुणे), किरण गोवींद खंडागळे (वय ३० वर्षे, रा. जवळके बु।। ता.खेड, जि.पुणे) यांना ताब्यात घेतले. नमुद आरोपींनी शिक्रापुर पोलीस स्टेशन हद्दीमध्ये वेगवेगळया ठिकाणच्या विद्युत रोहीत्रांमधील तांब्याच्या तारा चोरी करून त्यापैकी काही तारा नारायणगाव येथे एकास विकल्याची कबुली दिली. त्यानंतर चोरीचा मुद्देमाल स्विकारणारा आरोपी पांडुरंग दशरथ वायकर, (वय ४० वर्षे, रा. नारायणगाव, ता. जुन्नर, जि.पुणे) यास ताब्यात घेतले असता त्याने देखील विद्युत रोहीत्रामधील तांब्याच्या तारा विकत घेतल्याचे कबुल केले. सदर आरोपींना न्यायालयात हजर केले असता, त्यांना २९ मार्चपर्यंत पोलीस कस्टडी देण्यात आली आहे.

आरोपींकडून गुन्हा करण्यासाठी वापरलेली १ इको कार, १ पिकअप गाडी, १ पल्सर मोटार सायकल यासह गुन्ह्यात चोरलेल्या तब्बल १९० किलो विद्युत रोहीत्रामधील तांब्याच्या तारा असा एकुण ११,९५,००० रूपयांचा मुद्देमाल जप्त करण्यात आला आहे. आरोपींनी तपासामध्ये एकुण ११ गुन्हे केल्याचे निष्पन्न झाले आहे.

सदरची कामगिरी पोलीस अधीक्षक पंकज देशमुख, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले यांच्या मार्गदर्शनाखाली पोलीस निरीक्षक दिपरतन गायकवाड, पोलीस उपनिरीक्षक महेश डोंगरे यांच्यासह पोलीस उपनिरीक्षक जितेंद्र पानसरे, पोहवा. श्रीमंत होनमाने, अमोल दांडगे, विकास पाटील, रोहीदास पारखे, शिवाजी चितारे, जयराज देवकर, संतोष मारकड, पोकों. नारायण वाळके यांचे पथकाने केली आहे. सदर गुन्ह्याचा पुढील तपास पोलीस हवालदार संतोष मारकड हे करीत आहेत.