दीपक खिलारे
इंदापूर : राज्यात उद्भवलेली दुष्काळसदृश परिस्थिती आणि दुधाच्या दरात होत असलेली कमालीची घट लक्षात घेऊन दूधगंगाचे संचालक राजवर्धन पाटील यांनी राज्याचे दुग्धविकासमंत्री राधाकृष्ण विखे पाटील यांची मुंबईत भेट घेतली.
उत्पादनावर होणारा खर्च यामुळे दुधाच्या दरावर परिणाम होत आहे. उत्पादनावर होणाऱ्या जास्त खर्चामुळे आता दुधाचे दर वाढले पाहिजे, अशी अनेक शेतकऱ्यांची मागणी असून, शासनाने त्वरित या सर्व गोष्टी विचारात घेता दूध दराचा प्रश्न लवकर मार्गी लावण्याची मागणी यावेळी पाटील यांनी केली. या भेटीत दूध दरवाढीची देखील चर्चा झाली असून, दूध दरात ७ रुपयांची वाढ होणार असल्याची माहिती समोर येत आहे.
दूधगंगा सहकारी दूध उत्पादक संघाच्या माध्यमातून इंदापूर तालुक्यात प्रतिदिन एक लाख लिटर दुधाचे संकलन करण्यात येत आहे. दुधगंगामुळे प्रत्यक्ष-अप्रत्यक्ष हजारो युवकांना रोजगार व व्यावसायिक हातभार लावण्यात व दूध व्यवसायाला चालना देण्यात दुधगंगा महत्वाची भूमिका बजावत आहे. यामुळे दूध उत्पादक शेतकऱ्यांच्या हातात जास्तीचा मोबदला देण्याचे काम दुधगंगाच्या माध्यमातून होत आहे. यामुळेच परिस्थिती लक्षात घेऊन दूध दरवाढीसंदर्भात राजवर्धन पाटील यांनी राधाकृष्ण विखे पाटलांची भेट घेऊन सकारात्मक चर्चादेखील झाली.
या भेटीत झालेल्या चर्चेनुसार दूध दरवाढीच्या प्रश्नांवर मंगळवारी (दि.२१) दुग्धविकास मंत्री राधाकृष्ण विखे पाटलांनी मंत्रिमंडळ बैठकीत चर्चा करून दूध दरात प्रति लिटर ७ रुपयांच्या वाढीबाबत निर्णय घेण्याबाबतची सकारात्मकता दर्शवली असल्याची माहिती दूधगंगेचे संचालक राजवर्धन पाटील यांनी यावेळी दिली.
