Crime News: अहिल्यानगर : अहिल्यानगर (Ahilyanagar) जामखेड तालुक्यातील बहुचर्चित न्यू कावेरी हॉटेलवरील गोळीबार प्रकरणातील मुख्य आरोपी अक्षय उर्फ चिंग्या विश्वनाथ मोरे (वय 24, रा. पाटोदा गरड) याला पोलिसांनी अखेर ताब्यात घेतले आहे. रोहित अनिल पवार याच्यावर गोळीबार करून पसार झालेला आरोपी खर्डा परिसरातून जामखेड पोलिसांच्या ताब्यात आला.
अहिल्यानगर स्थानिक गुन्हे शाखा आणि जामखेड पोलिसांनी 6 मार्च रोजी संयुक्त कारवाईत ही धडक कारवाई केली. काही दिवसांपासून फरार असलेल्या मोरेच्या हालचालींबाबत पोलिसांना गोपनीय माहिती मिळाल्यानंतर तांत्रिक माहितीच्या आधारे सापळा रचून त्याला अटक करण्यात आली.
कान्होपात्रा नगर येथील रोहित पवार हा न्यू कावेरी हॉटेलमध्ये असताना त्याच्यावर पिस्तूलातून गोळीबार झाला आणि तो गंभीर जखमी झाला होता. तपासात असे निष्पन्न झाले की शुभम शहाराम लोखंडे, उल्हास विलास माने उर्फ वस्ताद, अक्षय उर्फ चिंग्या मोरे, अर्शद अमीन सय्यद आणि इतर 6 ते 7 साथीदारांनी एकत्र येऊन हल्ला केला होता. हल्लेखोरांनी हॉटेलमधील साहित्य तसेच तिथे उभी असलेली फॉर्च्युनर गाडीही तोडफोड केली. याप्रकरणी जामखेड पोलीस ठाण्यात भारतीय दंड संहिता 2023 तसेच आर्म्स अॅक्ट अंतर्गत गुन्हा (गु.र.नं. 669/2025) नोंदवण्यात आला होता.
मुख्य आरोपी अक्षय मोरे हा पूर्वीच रेकॉर्डवरील सराईत गुन्हेगार असून त्याच्यावर हत्या, हत्येचा प्रयत्न, दरोडा, खंडणी अशा 10 पेक्षा अधिक गंभीर गुन्ह्यांची नोंद आहे. आरोपीला अटक केल्यानंतर चौकशीदरम्यान त्याने गुन्ह्याची कबुली दिली. ही कारवाई सहाय्यक पोलीस निरीक्षक हरीष भोये, पोलीस उपनिरीक्षक महादेव गुट्टे, समीर अभंग, पो.उ.प.नि किशोर गावडे, पुष्कर कडू आणि पोलीस अंमलदारांच्या पथकाने केली. प्रकरणाचा पुढील तपास पोलीस निरीक्षक दशरथ चौधरी यांच्या मार्गदर्शनाखाली सुरु आहे.
