पुणे : पुण्यातील धनकवडी येथील तळजाई पठार येथे खाजगी सावकाराच्या जाचाला कंटाळून व्यावसायिकानी आत्महत्या केल्याची घटना घडली आहे. सावकारांनी पैशासाठी तगदा लावून मानसिक त्रास दिला. या सततच्या जाचाला कंटाळून एका भंगार व्यावसायिकाने राहत्या घरात गळफास घेऊन आत्महत्या केली आहे. ही घटना हा फेब्रुवारी रोजी घडली आहे. आजिनाथ सर्जेराव लोखंडे (रा. सर्वे नं. ८, तळजाई मंदिराजवळ, तळजाई पठार, धनकवडी) असं आत्महत्या केलेल्या व्यावसायिकाचे नाव आहे.
याप्रकरणी आजिनाथ यांच्या पत्नी सारीका लोखंडे यांनी गुरुवारी २२ फेब्रुवारीला सहकारनगर पोलीस ठाण्यात फिर्याद दिली आहे. यावरून सहकरानगर पोलिसांनी ३ खासगी सावकारांवर गुन्हा दाखल केला आहे. रामदास काशिनाथ त्रिंबके (रा. बाभुळगाव, ता. माढा, जि. सोलापूर), व्यास गुलाब यादव (रा. जांभुळवाडी), मयुर विलास साळुंखे (रा. पंचवटी सोसायटी, चव्हाणनगर, धनकवडी) अशी गुन्हा दाखल झालेल्या व्यक्तींची नावे आहेत.
पोलिसांनी दिलेल्या अधिक माहितीनुसार, फिर्यादी यांचे पती आजिनाथ लोखंडे यांचा भंगाराचा व्यवसाय आहे. त्यांना आर्थिक अडचण भासल्याने त्यांनी आरोपींकडून वेळोवेळी व्याजाने पैसे घेतले होते. मात्र, व्यावसायातील मंदीमुळे त्यांना आरोपींचे पैसे परत करता आले नसल्यामुळे आरोपींनी पैसे परत कर असे म्हणत पैशांसाठी फिर्यादी यांच्या पतीकडे तगादा लावला होता.
पैसे परत करत नसल्याच्या कारणावरुन आरोपींनी आजिनाथ यांना सतत शिवीगाळ करुन धमकी देण्याचा प्रकार सुरु होता. तसेच पैशांची सतत मागणी करुन त्यांना मानसिक त्रास देखील दिला. वारंवार होत असलेल्या मानसिक त्रासाला वैतागून फिर्यादी यांच्या पतीने राहत्या घरात गळफास घेऊन आत्महत्या केल्याचं तक्रारीत म्हटलं आहे. पोलिसांनी आरोपींवर आत्महत्येस प्रवृत्त केल्याचा गुन्हा दाखल केला असून पुढील तपास महिला पोलीस उपनिरीक्षक रेश्मा साळुंखे करत आहेत.
