पुणे: पुणे जिल्ह्यातील लोणावळा येथे धबधब्यात अन्सारी आणि सय्यद कुटुंबीय वाहून गेल्याची घटना नुकतीच घडली आहे. यानंतर पर्यटकांच्या सुरक्षेचा प्रश्न पुन्हा एकदा ऐरणीवर आला आहे. आता याच अनुषंगाने थेट मुख्यमंत्री एकनाथ शिंदे यांनी कठोर कारवाईचे आदेश दिलेत. संध्याकाळी सहानंतर पर्यटकांना पर्यटनस्थळी फिरण्यास मनाई करण्यात आली आहे. तसेच याकडे दुर्लक्ष करणाऱ्या पर्यटकांना आणि कारवाईत हलगर्जीपणा करणाऱ्या अधिकाऱ्यांवर देखील कारवाई केली जाणार आहे, असल्याचे पुण्याचे जिल्हाधिकारी सुहास दिवसेंनी सांगितले आहे. पुढच्या काही तासांत लोणावळ्यातील पर्यटनासाठी विशेष नियमावली जाहीर केली जाणार असल्यादेखील जिल्हाधिकाऱ्यांनी स्पष्ट केले.
लोणावळ्यात पर्यटनासाठी आल्यानंतर हुल्लडबाजी करणऱ्या तरुणांवर कठोरात कठोर कारवाई करण्यात येणार आहे. इतर पर्यटांकांना त्रास होईल, असे वर्तन, हुल्लडबाजी कदापि सहन केली जाणार नाही. त्यांच्यावर कारवााई ही निश्चित होणार आहे. विकेंड आणि सार्वजनिक सुट्ट्या असल्यानंतर तरुण- तरुणी मोठ्या प्रमाणावर येतात. यावेळी रात्री गोंधळ घालणे, हुल्लडबाजी करणे, अशा अनेक तक्रारी प्राप्त झाल्या आहेत. या सर्व गोष्टींच्या पार्श्वभूमीवर संध्याकाळी सहानंतर पर्यटकांना पर्यटनस्थळी फिरण्यास मनाई करण्यात आली आहे. जर संबंधित अधिकाऱ्याने कारवाई करण्यात दिरंगाई अथवा दुर्लक्ष केले, तर थेट अधिकाऱ्यावरच कारवाई होणार आहे. याबाबत आम्हाला मुख्यमंत्र्यांचे स्पष्ट आदेश आले आहेत, असे जिल्हाधिकाऱ्यांनी म्हटले आहे.
