पुणे : मुंबई-बंगळुरू महामार्गावरील नवले पुलाजवळ एका डंपरने ट्रॅव्हल्सला जोरदार धडक दिली. यात डंपरचालकासह ट्रॅव्हल्समधील सात प्रवाशी जखमी झाले. हा अपघात आज सकाळी ६ वाजण्याच्या सुमारास झाला.
नवले पुलाजवळ वारंवार अपघात होत असल्यामुळे हा मार्ग वाहतुकीसाठी धोकादायक झाला आहे. पुलाजवळ व्हीआरएल ट्रॅव्हल्स कंपनीचे ऑफिस आहे. येथून सकाळी सात वाजण्याच्या सुमारास प्रवाशांना घेऊन ट्रॅव्हल्स बाहेर पडत असताना मुंबईच्या दिशेकडून भरधाव वेगाने आलेल्या डंपरने ट्रॅव्हल्सला पाठीमागून जोराची धडक दिली. घटनेची माहिती मिळताच सिंहगड रस्ता वाहतूक विभागाचे अंमलदार यांनी तत्काळ घटनास्थळी पोहचून जखमींना जवळच्या रुग्णालयात उपचारासाठी दाखल केले आहे. या भीषण अपघातात सात प्रवाशी जखमी झाले असून, ट्रॅव्हल्सचे तसेच डंपरचे नुकसान झाले आहे. या अपघातामुळे काही वेळ वाहतूक कोंडी झाली होती. अपघातग्रस्त वाहने रस्त्याच्या मधून क्रेनच्या साह्याने बाजूला घेण्यात आली. नवले पुलावरील विचित्र उतारामुळे वाहनांवरील नियंत्रण सुटून अपघात होत असतात.
नवले पुलाजवळ दोन दिवसांपूर्वी विचित्र अपघात झाला होता. एका भरधाव ट्रॅंकरने पाच ते सहा वाहनांना धडक दिल्याची ही घटना घडली आहे. या अपघातात अनेक गाड्यांचे मोठे नुकसान झाले. या अपघातामुळे एका बाजूने नवले पुलावरील वाहतूक काही वेळ थांबवण्यात आली होची. अपघात पाहण्यासाठी अनेकांनी गर्दी केली होती. या पुलावर वारंवार घडणाऱ्या अपघातांच्या मालिकेमुळे राष्ट्रीय महामार्ग प्राधिकरणाच्या विरोधात नागरिक संतप्त झालेले पाहायला मिळत आहेत. याबाबत राष्ट्रीय महामार्ग प्राधिकरणाच्या वतीने ठोस उपाययोजना करण्याची मागणी स्थानिकांकडून होते आहे.
शहरातील १९ अपघात प्रवण ठिकाणी (ब्लॅकस्पॉट) निश्चित केले आहेत. या ठिकाणी अपघात रोखण्यासाठी वाहतूक विषयक सुधारणा करण्यासंबंधी वाहतूक पोलिसांनी महापालिका सार्वजनिक बांधकाम विभाग आणि राष्ट्रीय महामार्ग प्राधिकरणाच्या अधिकाऱ्यांना पत्रव्यवहार केला असून, त्यानुसार काही सुधारणा देखील करण्यात आल्या आहेत. केंद्रीय रस्ते वाहतूक व महामार्ग मंत्रालयाने नुकत्याच जाहीर केलेल्या आकडेवारीवरून रस्ते अपघातात मृत पावणाऱ्यांमध्ये ६७ टक्के दुचाकीस्वारांचा समावेश असल्याचे स्पष्ट झाले आहे.
