वाघोली, (पुणे) : वाघोली-बकोरी रस्त्यावर ट्रकच्या चाकाखाली आल्याने दुचाकीस्वाराचा मृत्यू झाल्याची घटना घडली. हा अपघात शुक्रवारी (ता. २३) रात्री १० वाजण्याच्या सुमारास घडला. शशांक सज्जनराव धाबेकर (वय-३०, मूळ रा. लातूर, सध्या रा. गुलमोहर सोसायटी, वाघोली) असे मृत्युमुखी पडलेल्या तरुणाचे नाव आहे.
या प्रकरणी लोणीकंद पोलीस ठाण्याचे पोलीस कर्मचारी नीलकंठ तुकाराम शिंदे यांनी फिर्याद दिली. त्यानुसार, ट्रक चालक अकबर मोहबद पठाण (वय ४७, रा. भीमनगर, विश्रांतवाडी) याच्यावर गुन्हा दाखल करण्यात आला आहे.
पोलिसांनी दिलेल्या माहितीनुसार, शशांक धाबेकर हा मूळचा लातूर येथील आहे. तो पुण्यात एका खाजगी कंपनीत काम करत होता. शशांक हा दुचाकीवर बकोरी रोडवरून बीजेएस चौकाच्या दिशेने जात होता. याचवेळी ट्रकही त्याच दिशेने जात होता. तो ट्रकच्या चाकाखाली आला तर दुचाकी दुसरीकडे फेकली गेली. शशांक चाकाखाली आल्याने त्याचा जागीच मृत्यू झाला. त्याच्या मागे पत्नी व एक मुलगी असा परिवार आहे.
दरम्यान, या प्रकरणी लोणीकंद पोलीस ठाण्याचे पोलीस कर्मचारी नीलकंठ तुकाराम शिंदे यांनी फिर्याद दिली. त्यानुसार, ट्रक चालक अकबर मोहबद पठाण याच्यावर गुन्हा दाखल करण्यात आला आहे. पुढील तपास लोणी कंद पोलीस करीत आहेत.
