Accident News: सोलापूर, दि. 22: सोलापूर-धुळे राष्ट्रीय महामार्गावर (Solapur-Dhule National Highway) झालेल्या भीषण अपघातात (Accident) साखरपुडा झालेल्या जोडप्याचा जागीच मृत्यू झाला. या दुर्दैवी घटनेमुळे परिसरात शोककळा पसरली आहे. विशेष म्हणजे या दोघांचा साखरपुडा अवघ्या 4 दिवसांपूर्वी झाला होता आणि लवकरच त्यांचा विवाह होणार होता. मात्र या अपघातामुळे त्यांच्या कुटुंबीयांवर दुःखाचा डोंगर कोसळला आहे.
मिळालेल्या माहितीनुसार, वाशी तालुक्यातील पारा येथील नामदेव शिनगारे यांचा मुलगा अक्षय रामभाऊ शिनगारे (वय 25) आणि इजोरा येथील सुनील चव्हाण यांची मुलगी अक्षया सुनील चव्हाण (वय 23) यांचा काही दिवसांपूर्वी साखरपुडा झाला होता. रविवारी सकाळी अक्षया हिला लातूर येथे महापारेषणची परीक्षा द्यायची होती. त्यामुळे पहाटे वाशी येथून घरच्या कारने ते लातूरकडे निघाले होते.
सकाळी सुमारे 6 वाजण्याच्या सुमारास रत्नापूर पाटीजवळील वळणावर चालकाचे वाहनावरील नियंत्रण सुटले. भरधाव वेगात असलेली कार थेट येडशी टोल नाक्याच्या कमानीवर जाऊन जोरात धडकली. धडक इतकी जोरदार होती की कारचा पुढील भाग पूर्णपणे चुरडला गेला. या भीषण अपघातात अक्षय आणि अक्षया यांचा जागीच मृत्यू झाला.
अपघाताची माहिती मिळताच स्थानिक नागरिक आणि पोलिसांनी तातडीने घटनास्थळी धाव घेतली. मात्र दोघांचाही मृत्यू झाला होता. या घटनेमुळे दोन्ही कुटुंबांवर दुःखाचा डोंगर कोसळला आहे. साखरपुड्यानंतर अवघ्या काही दिवसांतच असे दुर्दैवी घडल्यामुळे परिसरात हळहळ व्यक्त केली जात आहे. पोलिस या प्रकरणाचा अधिक तपास करत आहेत.
