सागर घरत
करमाळा : करमाळा तालुक्यातील जेऊर येथे श्री छत्रपती शिवाजी महाराजांच्या पूर्णाकृती पुतळ्यासाठी आणि शिवसृष्टीसाठी ७५ लाख रुपयांचा निधी मिळावा, अशी मागणी माजी आमदार नारायण पाटील यांनी मुख्यमंत्री एकनाथ शिंदे यांच्याकडे केली आहे.
राज्याचे हिवाळी अधिवेशन नागपूर येथे सुरू आहे. माजी आमदार नारायण पाटील यांनी नागपूर येथे जाऊन प्रत्यक्षात मुख्यमंत्री एकनाथ शिंदे यांची भेट घेतली. या वेळी करमाळा मतदारसंघातील रखडलेल्या विकासकामांना निधी मिळावा, अशी मागणी त्यांनी केली. या कामाबद्दल चर्चा केली तसेच जेऊर येथे श्री छत्रपती शिवाजी महाराज यांचा पूर्णाकृती पुतळा उभा करण्याचा जेऊर ग्रामपंचायतीचा संकल्प असून, यासाठी लागणाऱ्या सर्व परवानग्या तसेच समितीसाठी राज्यसरकारचे सहकार्य आणि पुतळा व शिवसृष्टीसाठी ७५ लाख रुपयांचा निधी मिळावा, अशी आग्रही मागणी माजी आमदार नारायण पाटील यांनी मुख्मंत्र्यांकडे केली.
मुख्यमंत्री एकनाथ शिंदे यांनी या मागणीला सकारात्मक प्रतिसाद दिला तसेच सर्वतोपरी सहकार्य करण्याचे आश्वासन दिले. या मागणीचे एक लेखी निवेदन माजी आमदार नारायण पाटील यांनी मुख्यमंत्र्यांकडे सादर केले. जेऊर येथे श्री छत्रपती शिवाजी महाराजांचा अश्वारूढ व पूर्णाकृती पुतळा उभा करण्याचा माजी आमदार नारायण पाटील यांचा अनेक वर्षांपासून मानस आहे. यासाठी जेऊर ग्रामपंचायतीकडून जागा निश्चित करण्यात आली आहे. तसेच माजी आमदार नारायण पाटील यांनी स्वतः काही नामांकित व पारंगत अशा शिल्पकारांची भेट घेऊन याबाबत माहिती घेतली. परंतु विविध शासकीय परवानग्या आणि निधी याबाबत राज्य सरकारचे सहकार्य मिळावे म्हणून त्यांनी आता थेट राज्याचे मुख्यमंत्री एकनाथ शिंदे यांना साकडे घातले आहे. यामुळे लवकरच हा पुतळा उभा राहणार, अशी आशा शिवप्रेमी आणि जेऊर परिसरातील नागरिक व्यक्त करत आहेत.
