पुणे: सांगलीचे पदवीधर आमदार अरुण लाड यांचे चिरंजीव शरद लाड भाजपमध्ये प्रवेश करणार आहेत. मंगळवारी (दि. 6) लाड यांचा भाजपमध्ये औपचारिक प्रवेश होणार असून, याआधी त्यांनी पदवीधर उमेदवारीची अट भाजपसमोर मांडली होती. गेल्या दीड महिन्यापासून पक्ष प्रवेश रखडला होता, मात्र राज्याचे उच्च आणि तंत्र शिक्षण मंत्री व सांगलीचे पालकमंत्री चंद्रकांत पाटील यांनी लाड यांची अट मान्य केल्यानंतर शरद लाड अखेर भाजपमध्ये प्रवेश करणार असल्याचे निश्चित झाले आहे.
भाजपमध्ये प्रवेश झाल्यानंतर शरद लाड यांना पदवीधर मतदार संघातील उमेदवारी मिळण्याची शक्यता अधिक स्पष्ट झाली आहे. मागील निवडणुकांमध्ये अरुण लाड यांनी बंडखोरी करत अपक्ष निवडणूक लढवली होती, ज्यामुळे काँग्रेस आणि राष्ट्रवादीला फटका बसला होता. तसेच मागील वेळी झालेल्या निवडणुकीत जवळपास ४९ हजार मत फरकाने अरुण लाड काँग्रेस, शिवसेना आणि राष्ट्रवादीकडून विजयी झाले होते. त्यावेळी काँग्रेस, तत्कालीन राष्ट्रवादी काँग्रेस आणि शिवसेनेची महाविकास आघाडी सत्तेवर होती. मात्र, आता महायुतीची सत्ता असलेल्या राज्यात भाजपकडून पदवीधर मतदार संघ पुन्हा जिंकण्यासाठी तयारी सुरू आहे.
मागील निकालांचा अभ्यास केल्यास, २०१४ मध्ये पुणे पदवीधर मतदार संघात अरुण लाड यांनी २५ हजारांहून अधिक मते मिळवली होती, तर चंद्रकांत पाटील विजयी झाले होते. या निकालावरून लाड यांची व्यक्तिगत राजकीय ताकद स्पष्ट होते.
सांगली जिल्ह्यात आणि राज्यात अरुण लाड यांचा संपर्क आणि प्रभाव मजबूत असल्यामुळे भाजपने पदवीधर मतदार संघाकडे लक्ष केंद्रित केले असल्याचे स्पष्ट होते. शरद लाड यांच्या प्रवेशानंतर पक्षात तसेच मित्रपक्षांमध्ये रणनीती ठरवून, निवडणुकीत यश मिळवण्याचा प्लॅन राबवला जाणार आहे. १९९० पासून ताब्यात असलेला पुणे पदवीधर मतदार संघ २०२० च्या निवडणुकीत हातातून गेल्याचे दु:ख भाजपला असल्याने निवडणुकीला एक वर्ष असतानाच भाजपने हा मतदार संघ पुन्हा काबीज करण्यासाठी आखणी सुरू केली आहे.
