पुणे- शिवसंग्राम संघटनेचे अध्यक्ष विनायक मेटे यांच्या गाडीचा मुंबई-पुणे एक्सप्रेसवर अपघात झाला. यानंतर त्यांना उपचारासाठी रुग्णालयात दाखल करण्यात आलं होतं. मात्र, उपचारादरम्यान विनायक मेटे यांचं निधन झालं. मात्र, या अपघातानंतर जवळपास 1 तास विनायक मेटे यांना मदत मिळाली नसल्याची धक्कादायक माहिती आता समोर आली आहे. विनायक मेटे यांना अपघातानंतर वेळेत मदत मिळाली असती तर कदाचित मेटे यांचा जीव वाचला असता असे बोलले जात आहे.
अपघात समयी विनायक मेटे यांच्या सोबत असणारे, मेटे यांचे सहकारी एकनाथ कदम यांनी याबाबत खुलासा केला आहे अपघातानंतर एक तास मदत मिळाली नाही. यानंतर 100 नंबरवर अनेकदा फोन केला. मात्र या नंबरवरील फोनही उचलला गेला नाही. मदतीसाठी अनेकदा कदम विनवणी करत होते. मात्र एकही गाडी थांबली नाही, अशी माहिती कदम यांनी दिली आहे. मेटे यांच्या डोक्याला आणि हाताला गंभीर दुखापत झाली होती. मी रोडवर झोपलो होतो, आम्ही गाड्यांना हात करत होतो. मग एका व्यक्तीने गाडी थांबवली आणि आम्हाला मदत केली. अपघातानंतर मी मेटे यांच्याशी बोललो, तेव्हा ते माझ्याशी संवाद करत होते, असंही एकनाथ कदम यांनी सांगितलं
मेटे यांचे सहकारी एकनाथ कदम यांनी केलेल्या खुलाशामुसार, अपघात ५ वाजता झाला. मदतीसाठी ६ वाजता धावून आले एक तास मी एकटा मदतीसाठी याचना करत होतो. रस्त्यावर झोपलो होतो पण गाडी एकही थांबली नाही. कोण विनायक मेटे? कोणते आमदार आम्हाला काही माहिती नाही अशी फोन केल्यावर उत्तरं मिळाली. मी शंभर नंबरवर मदत मागितली. मदतसाठी फोन केले त्यावेळी शंभर नंबरवर काम करणारे कर्मचारी पूर्णपणे झोपेत होते .तेथील कर्मचाऱ्यांकडे मदत मागितली त्यांनी नावंही सांगितली नाहीत. शेवटी छोटा हत्ती चालला होता. त्याच्याकडे मदत मागितली. यामळे मेटे यांना वेळेवर मदत मिळाली असती तर कदाचित मेटे यांचा जीव वाचला असता असेही कदम यांनी स्पष्ट केले आहे.
दरम्यान मुख्यमंत्री एकनाथ शिंदे यांनी मेटे यांच्या अपघाताची उच्चस्तरीय चौकशी करण्याची घोषना केली आहे. यामंळे कदम यांनी केलेल्या दाव्याबाबत चौकशीनंतरच समजणार आहे.
