पाकिस्तान : पाकिस्तानच्या खैबर पख्तूनख्वा प्रांतातील कोहाट जिल्ह्यात शुक्रवारच्या नमाजादरम्यान भीषण स्फोट झाल्याची घटना घडली. पोलीस लाइन्स परिसरातील मशिदीजवळ झालेल्या या स्फोटात १५ जणांचा मृत्यू झाला असून ५० हून अधिक नागरिक जखमी झाले आहेत. काही ताज्या माहितीनुसार मृतांचा आकडा १६ वर पोहोचल्याचे सांगण्यात येत आहे.
शुक्रवार, १८ सप्टेंबर रोजी दुपारी नमाजासाठी मोठ्या संख्येने नागरिक मशिदीत जमले होते. त्याचवेळी पोलीस लाइन्स परिसरात जोरदार स्फोट झाला. स्फोटाचा आवाज ऐकून परिसरात मोठी खळबळ उडाली. जखमींना तातडीने कोहाट येथील जिल्हा मुख्यालय रुग्णालयात दाखल करण्यात आले.
कोहाट डीएचक्यू रुग्णालयाचे वैद्यकीय अधीक्षक ताहिर अली शाह यांच्या माहितीनुसार, स्फोटानंतर १५ मृतदेह आणि ५० हून अधिक जखमींना रुग्णालयात आणण्यात आले. जखमींची संख्या वाढण्याची शक्यता लक्षात घेऊन रुग्णालय प्रशासनाने आपत्कालीन परिस्थिती जाहीर केली. मृतांमध्ये नागरिकांसह काही पोलीस कर्मचाऱ्यांचाही समावेश असल्याची माहिती पोलिसांनी दिली आहे.
स्फोटाची तीव्रता मोठी असल्याने मशिदीच्या बाहेरील भागाचे नुकसान झाले असून एका भिंतीचा काही भाग कोसळला. स्फोटाच्या ठिकाणी जमिनीत मोठा खड्डाही पडला. परिसरातील काही इमारतींचेही नुकसान झाल्याचे सांगण्यात आले. माहिती मिळताच बचाव पथके, रुग्णवाहिका आणि अतिरिक्त सुरक्षा दल घटनास्थळी दाखल झाले. ढिगाऱ्याखाली अडकलेल्या नागरिकांचा शोध घेण्यासाठी बचावकार्य सुरू करण्यात आले.
प्राथमिक तपासात हा आत्मघाती हल्ला असल्याचे समोर आल्याचे पोलिसांनी सांगितले आहे. मात्र, या हल्ल्याची जबाबदारी अद्याप कोणत्याही दहशतवादी संघटनेने स्वीकारलेली नाही. स्फोटामागील नेमके कारण, हल्ल्याचा उद्देश आणि संबंधित सूत्रधारांचा शोध घेण्यासाठी सुरक्षा यंत्रणांकडून तपास सुरू आहे. दरम्यान, पोलीस लाइन्स परिसरात अतिरिक्त सुरक्षा बंदोबस्त तैनात करण्यात आला असून कोहाट-हांगू मार्गावरील वाहतूक काही काळासाठी बंद करण्यात आल्याची माहिती आहे.
