मेरठ: उत्तर प्रदेशातील मेरठ जिल्ह्यात एक हृदयद्रावक घटना समोर आली आहे. बारावीत शिकणाऱ्या आस्था उर्फ तनिष्का (वय 17) या विद्यार्थिनीचा तिच्या आईनेच गळा दाबून खून केला आणि नंतर तिच्या मामे भावांसह मृतदेहाची निर्घृण विल्हेवाट लावली. या घटनेमुळे परिसरात खळबळ उडाली आहे.
दादरी गावातील रहिवासी असलेल्या आस्थाचा बुधवारी (4 जून) दुपारी 1 वाजता तिच्या मित्राशी फोनवर संवाद सुरू होता. तेव्हा तिची आई राकेश देवीने रागाच्या भरात फोन हिसकावून घेतला. या गोष्टीवरून दोघींमध्ये वाद निर्माण झाला. वाद इतका वाढला की राकेश देवीने आस्थाचा गळा दाबून तिचा जीव घेतला. या घटनेनंतर राकेश देवीने आपल्या भावाला घटनेबाबत माहिती दिली. त्यानंतर मेहरौली गावातून तिचे मामा आणि चुलत भाऊ कारने दादरी येथे आले. त्यांनी मिळून मृतदेह नष्ट करण्याचा कट रचला. आस्थाचे शिर धारदार शस्त्राने कापून तिचा धड परतापूरच्या बहादूरपूर कालव्यात फेकून देण्यात आला.
आस्था ही सीआरपीएफमध्ये कार्यरत असलेल्या रमेश कुमार यांची मुलगी होती. ती 4 जूनपासून बेपत्ता होती. मात्र, कुटुंबीयांनी पोलिसांना याबाबत कोणतीही माहिती दिली नव्हती. 5 जून रोजी सकाळी नाल्यात एका डोके नसलेल्या मृतदेहाचा शोध लागल्यानंतर ही घटना उघडकीस आली.
पोलिसांनी मृतदेहाजवळील सलवारमध्ये सापडलेल्या एका कागदावर लिहिलेला मोबाईल क्रमांक पाहून आस्थाची ओळख पटवली. त्यानंतर तिच्या मित्राने देखील मृतदेह पाहून ओळख दिली. पोलिसांनी तात्काळ आस्थाच्या आईसह दोन्ही भावांना ताब्यात घेतलं. त्यानंतर मेहरौली गावात जाऊन तिचे मामा आणि चुलत भाऊ देखील अटक करण्यात आले. हत्येनंतर राकेश देवीने मुलगी बेपत्ता असल्याचे भासवत गावकऱ्यांसह शोध सुरू केला होता. मात्र पोलिसांपर्यंत माहिती पोहोचवली नव्हती. जेव्हा पोलिस तपासासाठी गावात पोहोचले तेव्हाच सत्य उघडकीस आले.
आस्थाच्या हत्येसंबंधित महत्त्वाचे पुरावे पोलिसांच्या हाती लागले आहेत. आरोपींची वापरलेली स्विफ्ट कार जप्त करण्यात आली असून तिचे सीसीटीव्ही फुटेज मिळाले आहे. तिचं शिर जानी गंगा कालव्यात फेकल्याची कबुली चुलत भाऊ मोनूने दिली असून, पोलिस पथक अद्याप शिराचा शोध घेत आहे.
