जालंधर: वाढदिवसाच्या दिवशीच २२ वर्षांच्या तरुणीचा (Monmoon Chitwan Death) गॅस गिझरमुळे मृत्यू झाल्याची अत्यंत दुर्दैवी घटना घडली आहे. मृत तरुणी मुनमून चितवन ही शिवसेना (उत्तर भारत) प्रमुख दीपक कंबोज यांची मुलगी होती. १ जानेवारी रोजी तिचा २२ वा वाढदिवस होता आणि घरात उत्सवाचे वातावरण होते. मात्र, आंघोळीसाठी बाथरूममध्ये गेलेली मुनमून बराच वेळ बाहेर आली नाही. कुटुंबीयांनी दरवाजा तोडून पाहिले असता ती तिथेच मृतावस्थेत सापडली.
बाथरूममध्ये असलेल्या गॅस गिझरमधून कार्बन मोनोऑक्साइड वायूची गळती झाल्यामुळे ही दुर्घटना घडली. प्राथमिक माहितीनुसार, गिझरच्या पाईपमध्ये तांत्रिक बिघाड झाला होता आणि बाथरूममध्ये खिडकी किंवा हवा खेळती राहण्यासाठी जागा नसल्यामुळे काही वेळातच विषारी वायू तिथे जमा झाला. यामुळे मुनमूनचा श्वास गुदमरला आणि ती जागीच बेशुद्ध पडली. सकाळी आनंदाने वाढदिवसाची तयारी करत असलेल्या कुटुंबावर या घटनेमुळे शोककळा पसरली आहे.
पोलिसांनी या प्रकरणाचा तपास सुरू केला असून मृतदेह शवविच्छेदनासाठी रुग्णालयात पाठवण्यात आला आहे. हिवाळ्याच्या काळात गरम पाण्यासाठी गॅस गिझर वापरताना पुरेशी खबरदारी घेणे किती गरजेचे आहे, हे या घटनेतून पुन्हा एकदा समोर आले आहे. मुनमून ही हुशार मुलगी होती आणि तिच्या वाढदिवसानिमित्त घरात मोठी तयारी करण्यात आली होती, मात्र नियतीने तिच्या आयुष्याचा असा करुण अंत केला. या घटनेची माहिती मिळताच परिसरात हळहळ व्यक्त होत आहे.
