नवी दिल्ली: सोन्याच्या किमतीत झालेल्या मोठ्या वाढीचा परिणाम आता सणासुदीच्या खरेदीवर दिसू लागला आहे. सप्टेंबरमध्ये भारतातील किरकोळ सोन्याच्या विक्रीत मागील वर्षाच्या तुलनेत 8 ते 10% घट झाल्याची माहिती समोर आली आहे. वाढलेले दर आणि जागतिक परिस्थितीतील अनिश्चिततेमुळे ग्राहक मोठ्या प्रमाणात सोने खरेदी करण्याऐवजी सावध भूमिका घेत आहेत.
गेल्या वर्षी 24 कॅरेट शुद्ध सोन्याचा दर सुमारे 98,000 रुपये प्रति 10 ग्रॅम होता. यंदा हा दर 1.57 लाख रुपयांच्या पुढे गेला आहे. त्यामुळे वर्षभरात सोन्याच्या किमतीत जवळपास 60% वाढ झाली आहे. सप्टेंबरमध्ये दर काही प्रमाणात खाली आले असले तरी ते अजूनही मागील वर्षाच्या तुलनेत खूपच जास्त आहेत.
याचा थेट परिणाम दागिन्यांच्या खरेदीवर झाला आहे. अनेक ग्राहक पूर्वीप्रमाणे मोठे आणि वजनदार दागिने घेण्याऐवजी कमी वजनाचे दागिने पसंत करत आहेत. काही ग्राहक 18 कॅरेट किंवा 14 कॅरेट दागिन्यांकडे, तसेच हिरे जडवलेल्या दागिन्यांकडे वळत असल्याचे बाजारातील निरीक्षण आहे. यामुळे ग्राहकांचा खर्च नियंत्रित ठेवण्याचा प्रयत्न दिसत आहे.
दरम्यान, जागतिक संघर्ष आणि सोन्याच्या दरातील चढ-उतारामुळे ग्राहकांमध्ये संभ्रम निर्माण झाला आहे. दर आणखी कमी होण्याची शक्यता वाटत असल्याने काही जण मोठी खरेदी पुढे ढकलत आहेत. मात्र, सण आणि लग्नसराईचा हंगाम सुरू झाल्यानंतर मागणीमध्ये काही प्रमाणात सुधारणा होऊ शकते, असे बाजारातील तज्ज्ञांचे मत आहे.
ज्वेलर्सकडूनही ग्राहकांना आकर्षित करण्यासाठी विविध ऑफर्स दिल्या जात आहेत. मेकिंग चार्जमध्ये सवलत, जुन्या सोन्याच्या बदल्यात नवीन दागिने अशा योजना राबवल्या जात आहेत. दुसरीकडे, काही ग्राहक दागिन्यांऐवजी गोल्ड ETF, गोल्ड बार आणि डिजिटल गोल्डकडेही वळत आहेत. त्यामुळे यंदाच्या सणासुदीत कमी वजनात सोने आणि जास्त मूल्य असा खरेदीचा नवा ट्रेंड दिसण्याची शक्यता आहे.
