आंध्र प्रदेश : आंध्र प्रदेशातील तिरुपती बालाजी मंदिरात प्रसादात भेसळीचा प्रकार ताजा असतानाच आंध्र प्रदेशातील आणखी एका मंदिरात असाच काहीसा प्रकार घडला आहे. प्रसिद्ध श्रीशैलम देवस्थानम मंदिराच्या प्रसादात झुरळ आढल्याची घटना घडली आहे. प्रसादात झुरळ आढल्याचा एक व्हिडिओ सध्या व्हायरल होत आहे. व्हिडिओ व्हायरल झाल्यानंतर भाविकांच्या चिंता वाढल्या आहेत.
समोर आलेल्या माहितीनुसार, ‘हा व्हिडिओ एका भक्ताने बनवला आहे. या व्हिडिओमध्ये लाडूच्या आत एक मृत झुरळ असल्याचे स्पष्टपणे दिसत आहे. भाविकाने हा व्हिडिओ सोशल मीडियावर शेअर केला असून, मंदिर प्रशासनाकडेही तक्रार केली आहे.
लेखी तक्रारीत भाविकाने म्हटले आहे की, ‘२९ जून रोजी मी श्रीशैलम देवस्थानम मंदिरात दर्शनासाठी गेलो होतो. जेव्हा मी प्रसादात दिलेला लाडू खायला सुरुवात केली तेव्हा मला त्यात एक मृत झुरळ आढळले. तरी याची नोंद घ्यावी.’ अशी तक्रार भाविकाने केली आहे.
दरम्यान, तक्रारीवर प्रतिक्रिया देताना कार्यकारी अधिकारी श्रीनिवास राव म्हणाले आहेत की, ‘या व्हिडिओची आणि तक्रारीची सत्यता जाणून घेण्यसाठी सीसीटीव्ही कॅमेरे तपासले जात आहे. यासंबंधित पुरावे मिळाल्यानंतर पुढील पाऊले उचलली जातील. असे सांगण्यात आले आहे.
तसेच जाणूनबुजून काही खोटी माहिती पसरवली जात आहे का? याचाही तपास करत असल्याचं सांगितलं जात आहे. दरम्यान, मंदिराचा प्रसाद ज्या ठिकाणी बनवला जातो त्याचाही आढावा घेत असल्याचं अधिकाऱ्यांनी सांगितलं आहे.
प्रसिद्ध श्रीशैलम देवस्थानम मंदिरात जगभरातून मोठ्या प्रमाणात भाविक दर्शन घेण्यासाठी येतात. तसेच दररोज हजारो भाविक हा प्रसाद खातात. मात्र, व्हिडिओ समोर आल्यानंतर भाविकांच्या आरोग्याशी खेळ केला जात आहे का? असा प्रश्न उपस्थित केला जात आहे. तसेच ज्या भाविकांनी याकाळात मंदिरात प्रसाद खाल्ला आहे त्यांच्यात भीतीचे वातावरण निर्माण झाले आहे.
