Delhi Blast Update: राष्ट्रीय राजधानी दिल्लीतील लाल किल्ला (Red Fort) परिसरात सोमवारी सायंकाळी 6 वाजून 52 मिनिटाला एका चालत्या कारमध्ये झालेल्या भीषण स्फोटाने देशाला हादरवून सोडले आहे. या दुर्घटनेत 11 जणांचा जागीच मृत्यू झाला, तर अनेक जण जखमी झाले. स्फोटामुळे परिसरातील अनेक वाहने जळून खाक झाली होती.
या भीषण बॉम्बस्फोटामागे नेमका कोणाचा हात आहे, याचा तपास राष्ट्रीय तपास यंत्रणा करत असताना, स्फोटाचा कथित मास्टरमाईंड म्हणून डॉ. उमर मोहम्मद याच्याकडे संशयाची सुई वळली आहे. स्फोट घडवून आणणाऱ्या या संशयित दहशतवाद्याचा पहिला फोटो आता तपास यंत्रणांच्या हाती लागला आहे.
मास्टरमाईंड डॉ. उमर मोहम्मद कोण?
समोर आलेल्या माहितीनुसार डॉ. उमर मोहम्मद हा जम्मू-काश्मीरमधील पुलवामा येथील रहिवासी आहे. तो फरिदाबाद येथील एका मेडिकल कॉलेजमध्ये कार्यरत होता. तो ‘व्हाईट कॉलर टेरर मॉड्यूल’ शी जोडलेला होता. स्फोटापूर्वीच हरियाणा आणि जम्मू-काश्मीर पोलिसांनी डॉ. आदिल अहमद राथर आणि डॉ. मुजम्मिल शकील या त्याच्या दोन जवळच्या साथीदारांना अटक केली होती.
या साथीदारांना अटक झाल्याची माहिती मिळताच उमर घाबरला आणि पुरावे नष्ट करण्याच्या किंवा कट पूर्ण करण्याच्या उद्देशाने त्याने कारमध्ये डेटोनेटर बसवून स्फोट घडवला. त्याने हा संपूर्ण कट अन्य दोन साथीदारांच्या मदतीने रचला होता. या स्फोटात 11 जणांचा मृत्यू झाला, तर 20 हून अधिक लोक जखमी झाले आहेत.
प्राथमिक माहितीनुसार, स्फोट घडवून आणताना डॉ. उमर मोहम्मद याने स्वतःलाही उडवून घेतले असावे, असा संशय तपास यंत्रणांना आहे. सीसीटीव्ही फुटेजमधून तोच कार चालवत असल्याचे दिसून आले आहे.
पुलवामा कनेक्शन समोर
या स्फोटानंतर दिल्ली पोलिसांनी तत्काळ तपास सुरू केला. स्फोटात वापरलेली i20 कार ट्रॅक केली असता, ती मूळतः हरियाणातील एका व्यक्तीची होती आणि ती अनेक हातांमधून जात अखेरीस पुलवामा येथील रहिवासी असलेल्या तारिक नावाच्या व्यक्तीकडून डॉ. उमर मोहम्मद याने घेतली होती, असे उघड झाले आहे.
याप्रकरणी पोलिसांनी पुलवामा येथून डॉ. उमर मोहम्मदच्या दोन सख्ख्या भावांना देखील चौकशीसाठी अटक केली आहे. बॉम्बस्फोटामागचे नेमके कारण काय होते आणि यामागे आणखी किती मोठे आंतरराज्यीय किंवा आंतरराष्ट्रीय नेटवर्क आहे, याचा सखोल तपास सध्या सुरक्षा यंत्रणांकडून सुरू आहे.
