Ali Khamenei Killed : मध्यपूर्वेतील संघर्षाने आतापर्यंतचं सर्वात भीषण वळण घेतलं असून, जगाचा नकाशा बदलू शकेल अशी घटना घडली आहे. शनिवारी सकाळी इस्रायल आणि अमेरिकेने इराणवर केलेल्या संयुक्त हवाई हल्ल्यात इराणचे सर्वोच्च नेते अयातुल्ला अली खामेनेई यांचा मृत्यू झाला आहे. या हल्ल्यात केवळ खामेनेईच नव्हे, तर त्यांचे कुटुंबीय आणि इराणच्या लष्करातील (IRGC) बडे अधिकारीही ठार झाले आहेत. या घटनेमुळे तिसऱ्या महायुद्धाची ठिणगी पडण्याची भीती निर्माण झाली आहे.
नेमकं काय घडलं?
शनिवारी, 28 February रोजी पहाटे इस्रायली लढाऊ विमानांनी तेहरानमधील खामेनेईंच्या निवासस्थानाला आणि लष्करी मुख्यालयाला लक्ष्य केलं. ज्यावेळी हा हल्ला झाला, तेव्हा खामेनेई हे त्यांच्या खास ‘अंडरग्राउंड’ बंकरमध्ये वरिष्ठ सल्लागारांसोबत एक उच्चस्तरीय गुप्त बैठक घेत होते. ‘वॉल स्ट्रीट जर्नल’च्या वृत्तानुसार, इस्रायलने या एकाच इमारतीवर तब्बल 30 बंकर-बस्टर बॉम्ब डागले. या भीषण स्फोटात खामेनेईंसह त्यांचे जावई, मुलगी, नातू आणि सून यांचाही जागीच मृत्यू झाला. तसेच IRGC प्रमुख मेजर जनरल मोहम्मद पाकपोर हे देखील या हल्ल्यात मारले गेले आहेत.
‘मोसाद’चं ते ‘एक’ ट्रेसिंग आणि खामेनेईंचा अंत
खामेनेई हे गेल्या अनेक दिवसांपासून सार्वजनिक जीवनातून गायब होते आणि अत्यंत सुरक्षित अशा गुप्त ठिकाणी लपून बसले होते. मात्र, इस्रायलची गुप्तहेर संघटना ‘मोसाद’ त्यांच्या मागावर होती. मोसादने खामेनेईंचे सुरक्षा सल्लागार शमखानी यांना ट्रॅक करण्यास सुरुवात केली होती. खरे तर हा हल्ला शनिवारी रात्री होणार होता, पण मोसादला माहिती मिळाली की शमखानी हे सकाळीच एका तातडीच्या बैठकीसाठी खामेनेईंच्या गुप्त निवासस्थानी पोहोचले आहेत. तिथे खामेनेई स्वतः उपस्थित असल्याची खात्री पटताच, इस्रायलने रात्रीची वाट न पाहता सकाळीच ‘ऑपरेशन’ फत्ते केलं.
पार्श्वभूमी आणि युद्धाचे पडसाद
इराण आणि इस्रायलमधील संघर्ष गेल्या काही दशकांपासून धगधगत आहे. इराणकडून हमास आणि हिजबुल्ला सारख्या संघटनांना मिळणारी मदत आणि इस्रायलवर होणारे रॉकेट हल्ले यांमुळे हे दोन्ही देश एकमेकांचे कट्टर शत्रू बनले आहेत. अमेरिकेने थेट या युद्धात उडी घेतल्याने आता इराणचे मित्र देश (रशिया आणि चीन) काय भूमिका घेतात, याकडे जगाचं लक्ष लागलं आहे.
