Ali Khamenei Death: इराण : इराणचे सर्वोच्च नेते अयातुल्ला अली खामेनी (Ali Khamenei) यांचा इस्रायल आणि अमेरिकेच्या संयुक्त हल्ल्यात मृत्यू झाल्याचा मोठा दावा करण्यात आला आहे. अमेरिका आणि इस्रायलमध्ये सुरू असलेल्या संघर्षाच्या पार्श्वभूमीवर ही खळबळजनक माहिती समोर आली आहे. अमेरिकेचे राष्ट्राध्यक्ष डोनाल्ड ट्रम्प (Donald Trump) आणि इस्रायलचे पंतप्रधान बेंजामिन नेतन्याहू (Benjamin Netanyahu) यांनी या वृत्ताला दुजोरा दिला असून इराणी माध्यमांनीही याला पुष्टी दिल्याचे समजते.
मिळालेल्या माहितीनुसार, खामेनी हे सुरक्षा परिषदेचे सल्लागार आणि इस्लामिक रिव्होल्यूशनरी गार्ड कॉर्प्सच्या प्रमुखांसोबत एक महत्त्वाची बैठक घेत होते. याच दरम्यान इस्रायलने त्या ठिकाणाला लक्ष्य करून जोरदार स्ट्राइक केला. हा हल्ला शनिवार, २८ फेब्रुवारी रोजी झाला असून यामध्ये ८६ वर्षीय खामेनी यांच्यासह त्यांच्या कुटुंबातील मुलगी, जावई आणि नात अशा चार सदस्यांचाही मृत्यू झाल्याचे वृत्त आहे. इराणमधील प्रेस टीव्हीने खामेनी यांच्या निधनानंतर ४० दिवसांचा राष्ट्रीय शोक जाहीर केल्याची माहिती समोर येत आहे.
डोनाल्ड ट्रम्प यांनी आपल्या सोशल मीडिया प्लॅटफॉर्मवर पोस्ट करत या कारवाईचे समर्थन केले आहे. त्यांनी खामेनी यांचा उल्लेख जगातील सर्वात वाईट व्यक्तींपैकी एक असा केला असून, त्यांच्या मृत्यूने न्याय मिळाल्याचे म्हटले आहे. जोपर्यंत मध्यपूर्वेत शांतता प्रस्थापित होत नाही, तोपर्यंत लष्करी कारवाया सुरू राहतील असा इशाराही ट्रम्प यांनी दिला आहे. या घटनेमुळे संपूर्ण जगात खळबळ उडाली असून इराण आणि इस्रायलमधील तणाव आता टोकाला पोहोचला आहे.
या मोठ्या घडामोडीनंतर इराणकडूनही प्रत्युत्तर म्हणून अमेरिकेच्या काही लष्करी तळांना लक्ष्य करण्यात आल्याचे समजते. सध्या संपूर्ण जगाचे लक्ष या युद्धाकडे लागले असून येणाऱ्या काळात परिस्थिती अधिक गंभीर होण्याची शक्यता वर्तवण्यात येत आहे.
