जळगाव: जळगावच्या धन्नोडमधील एक दुःखद घटना समोर आली आहे, जिथे सोनी चेतन चव्हाण या २२ वर्षीय विवाहित महिलेने राहत्या घरात गळफास घेऊन आत्महत्या केल्याची धक्कादायक घटना घडली आहे. ही घटना सोमवार, १७ मार्च रोजी रात्री १० वाजता घडली, जेव्हा सोनी घरी एकटी होती. दरम्यान, घरात कोणी नसल्याचे पाहून तिने गळफास घेऊन आत्महत्या केली. सासरच्यांनी पाहिल्यानंतर तिला तत्काळ रुग्णालयात नेण्यात आले तिथे तिला डॉक्टरांनी तपासून मृत घोषित केले.
सोनीच्या कुटुंबाचा आरोप आहे की, तिचा पती चेतन गजानन चव्हाण हा दारूचे व्यसन करत होता आणि दारूच्या नशेत तो तिला नियमितपणे मारहाण करायचा. सोनीने यापूर्वी छळाला कंटाळून विषारी पदार्थ पिऊन आत्महत्या करण्याचा प्रयत्न केला होता, परंतु यावेळी तिच्या आईने दावा केला आहे की, तिचा पती आणि सासरच्या लोकांनी तिची हत्या केली आहे. सोनीच्या पती आणि सासरच्या लोकांवर गुन्हा दाखल करावा आणि त्यांना तात्काळ अटक करावी अशी मागणी सोनीच्या कुटुंबाने केली आहे.
