मुंबई : उद्धव ठाकरे यांच्या शिवसेनेच्या दसरा मेळाव्याची तयारी अंतिम टप्प्यात आली आहे. एकीकडे मुख्यमंत्री एकनाथ शिंदे यांच्या दसरा मेळाव्यासाठी त्यांच्या गटाने देखील जोरदार तयारी सुरु केली आहे. तर दुसरीकडे ठाकरे गटही एकदम पेटून उठला आहे. उद्धव ठाकरे गटाचा दसरा मेळावा दादरमधील शिवाजी पार्कवर होणार आहे. तर शिवसेना एकनाथ शिंदे गट यांचा दसरा मेळावा आझाद मैदान येथे नियोजित आहे. दोन्ही गटाकडून आपापल्या दसरा मेळाव्याचा टिझर रिलीज केला आहे. यातच आता उद्धव ठाकरे यांच्या शिवसेनेने दसरा मेळाव्याच्या निमित्ताने नवे गाणेच लाँच केले आहे. ‘पक्ष आपला ठाकरे’ अशा शब्दांनी या गाण्याची सुरुवात आहे.
पक्ष आपला ठाकरे, चिन्ह आपलं ठाकरे, ‘दैवत आपलं ठाकरे’, असे गाण्याचे बोल आहेत. शिवसेनेत झालेली फूट, बाळासाहेबांचे विचार, उद्धव ठाकरे आणि आदित्य ठाकरे यांची वाटचाल याबाबत या गाण्यातून भाष्य केलं आहे.
“ठाकरे ह्या नावाची ताकदच अशी आहे की ते नाव पाठीशी असल्यावर जगातल्या कुठल्याही आव्हानाला तोंड द्यायची शक्ती निष्ठावंत शिवसैनिकांच्या मनगटात येते. कधीही न आटणारा उर्जेचा आणि मायेचा स्रोत म्हणजेच तमाम निष्ठावान शिवसैनिकांचं दैवत ‘ठाकरे’! ह्याच दैवतावरच्या प्रेमापोटी शिवसैनिकांनी अर्पण केलेलं हे नवीन गीत..’दैवत आपलं ठाकरे’!, असं शिवसेना ठाकरे गटाने म्हटलं आहे.
