मुंबई : बीड जिल्ह्यातील सरपंच संतोष देशमुख यांच्या हत्याप्रकरणातील घटनेचे थरकाप उडवणारे फोटो समोर आले आहेत. यामुळे राज्यभरातून तीव्र संताप व्यक्त करण्यात येत आहे. त्यानंतर मंत्री धनंजय मुंडेंनी आपल्या मंत्रिपदाचा राजीनामा दिला आहे. यावर आता, स्वराज्य पक्षाचे संस्थापक व माजी खासदार संभाजीराजे छत्रपती यांनी धनंजय मुंडेंच्या राजीनाम्यावर आपली प्रतिक्रिया दिली आहे.
सांभाजीराजे प्रतिक्रिया देत म्हणाले, ”संतोष देशमुख यांच्या हत्येचे फोटो बाहेर आले, त्यामुळे केवळ या प्रकरणातील आरोपींचेच नाही तर या आरोपींना पोसणाऱ्या, त्यांना पाठीशी घालणाऱ्या अनेकांच्या चेहऱ्यांमागची विकृती समोर आली आहे. बीड जिल्ह्यातील या गुन्हेगारांचा आश्रयदाता धनंजय मुंडेच असल्याचे आम्ही सांगून नि:पक्षपातीपणे या प्रकरणाचा तपास व्हावा, यासाठी धनंजय मुंडेला मंत्रीपदच देऊ नये, अशी मागणी आम्ही तेंव्हाच अडीच महिन्यांपूर्वी केली होती. परंतु तरीही मुंडेला मंत्रिपद दिले गेले. किंचितही नैतिकता असती तर अडीच महिन्यांपूर्वीच हा राजीनामा त्यांनी दिला असता. मंत्रिपदाचं कवच घालून आरोपपत्र दाखल होण्याची वाट पाहत होता का ? त्याचा आजचा राजीनामा ही एकप्रकारची कबुलीच आहे’. अशी प्रखर प्रतिक्रिया संभाजीराजेंनी दिली आहे.
