मुंबई: आगामी लोकसभा निवडणूक तोंडावर आहे. अशातच महाविकास आघाडी आणि महायुती यांच्यातील जागावाटपाचा मुद्दा चर्चेत आहे. लोकसभेच्या जागावाटपावरून इंडिया आघाडीत मतभेद असल्याची चर्चा राजकीय वर्तुळात होत आहे. याबाबत राष्ट्रवादीचे प्रदेशाध्यक्ष जयंत पाटील यांनी प्रतिक्रिया दिली आहे. या सर्व चर्चांवर त्यांनी पडदा टाकला आहे. इंडिया आघाडीची येत्या दोन दिवसांत बैठक पार पडेल. 25 तारखेला जागा वाटप जाहीर होईल. एकत्रित जागा वाटप बैठक त्याच दिवशी आहे. कोणत्याही प्रकारचे वाद आमच्यात नाहीत, असं जयंत पाटील यांनी म्हटलं आहे.
सुनावणीबाबत जयंत पाटील काय म्हणाले?
आज आमची सुनावणी पार पडणार आहे. समोरच्या बाजूने वेळ मागितला जाण्याची शक्यता आहे. आज फेरसाक्ष पार पडेल का? याबाबत थोड्या वेळात कळेल. शरद पवार हे सर्वांना बोलवायचे आणि निर्णय घ्यायचे. प्रांताध्यक्ष म्हणून अध्यक्ष म्हणुन तटकरे यांनी दीर्घकाळ काम केलं आहे. शरद पवार यांनी एकांगी कधीही निर्णय घेतला नाही, असं जयंत पाटील म्हणाले.
शिवसेनेच्या आणि राष्ट्रवादीच्या सुनावणीमध्ये एक फरक आहे. आम्ही पूर्वानुभवानुसार घटनेमध्ये काही बदल केलेले आहेत. आम्ही योग्य खबरदारी घेतलेली आहे. दरम्यान अजित पवार गटाने मुदत वाढ मागितली आहे. आमच्या वकिलांनी त्यांना विरोध केला. पण अध्यक्षांनी वेळ मागितला. मला वाटतं आज आमची साक्ष होईल. अनिल पाटील हेच 2019 आमच्या पक्षात आले. त्यांना आमचा पक्ष कसा चालतो, त्यांना माहीत नाही, असंही जयंत पाटील म्हणाले.
