मुंबई: मराठा आरक्षणाचा चेहरा मनोज जरांगे पाटील यांच्या अडचणीत वाढ झाली आहे. काही महिन्यांपूर्वी मुंबईतील आझाद मैदानावर मराठा आरक्षणासाठी केलेल्या आंदोलनाप्रकरणी चौकशीसाठी मुंबई पोलिसांनी जरांगे पाटील यांना समन्स बजावले आहे. येत्या 10 नोव्हेंबर रोजी सकाळी 11 वाजता त्यांना आझाद मैदान पोलीस ठाण्यात हजर राहण्याच्या सूचना देण्यात आल्या आहेत.
गुन्हा कशासाठी?
पोलिसांनी दिलेल्या माहितीनुसार, जरांगे पाटील यांनी 2 सप्टेंबर रोजी मराठा समाजाला आरक्षण देण्याच्या मागणीसाठी आझाद मैदानावर आमरण उपोषण सुरू केले होते. या आंदोलनासाठी त्यांनी कोणतीही अधिकृत परवानगी घेतली नव्हती. परवानगी नसताना आंदोलन केल्याप्रकरणी आझाद मैदान पोलीस ठाण्यात मनोज जरांगे पाटील आणि त्यांच्या इतर सहकाऱ्यांविरोधात गुन्हा दाखल करण्यात आला होता.
इतर पाच सहकाऱ्यांनाही समन्स
मनोज जरांगे पाटील यांच्यासह या प्रकरणात पांडुरंग तारक, गंगाधर कालकुटे, चंद्रकांत भोसले, वीरेंद्र पवार आणि प्रशांत सावंत या पाच जणांनाही चौकशीसाठी समन्स पाठवण्यात आले आहेत.
राजकीय वादात कायदेशीर पेच
मनोज जरांगे पाटील सध्या राष्ट्रवादीचे आमदार धनंजय मुंडे यांच्यावर केलेल्या गंभीर आरोपांमुळे राज्यभर चर्चेत आहेत. मुंडे यांच्या सांगण्यावरूनच माझ्या हत्येचा कट रचण्यात आल्याचा खळबळजनक दावा जरांगे पाटलांनी केला होता. एका बाजूला हा राजकीय संघर्ष सुरू असताना, दुसऱ्या बाजूला जुन्या आंदोलनामुळे आलेल्या कायदेशीर समन्समुळे जरांगे पाटील यांच्यासमोरील आव्हान वाढले आहे.
आता जरांगे पाटील 10 नोव्हेंबर रोजी पोलिसांच्या चौकशीला उपस्थित राहतात की नाही, याकडे आता सर्वांचे लक्ष लागले आहे.
