पुणे: होळी आणि धूलिवंदन म्हणजे रंगांची उधळण! पण याच रंगांमध्ये (Pre-Holi Preparation) असलेले ‘केमिकल्स’ तुमच्या त्वचेसाठी आणि केसांसाठी घातक ठरू शकतात. रंगांमुळे त्वचा कोरडी पडणे, खाज सुटणे किंवा केस राठ होणे अशा समस्या उद्भवतात. मात्र, थोडी पूर्वतयारी केली तर तुम्ही या समस्यांपासून वाचू शकता.
त्वचेची काळजी
तेलाचा वापरा: होळी खेळायला बाहेर पडण्यापूर्वी संपूर्ण शरीराला खोबरेल तेल, बदाम तेल किंवा ऑलिव्ह ऑईलने मसाज करा. यामुळे त्वचेवर एक संरक्षक थर तयार होतो, ज्यामुळे रंग त्वचेच्या आत जात नाही.
-
सनस्क्रीन विसरू नका: उन्हात रंग खेळल्याने ‘टॅनिंग’ होऊ शकते. त्यामुळे वॉटरप्रूफ सनस्क्रीन नक्की लावा.
-
पूर्ण कपडे घाला: शक्यतो अंगाला पूर्ण झाकतील असे सुती कपडे निवडा. जेवढी त्वचा कमी उघडी असेल, तेवढा रंगांचा संपर्क कमी येईल.
-
नखांची सुरक्षा: नखांमध्ये रंग अडकून ते खराब होतात. हे टाळण्यासाठी नखांवर गडद रंगाची नेलपॉलिश लावा आणि नखांच्या कडांना थोडे पेट्रोलियम जेली लावा.
केसांचे संरक्षण
-
चंपी महत्त्वाची: केसांना मुळांपासून टोकापर्यंत कोमट खोबरेल तेलाने मसाज करा. तेल लावल्यामुळे रासायनिक रंग केसांच्या आत शिरत नाहीत.
-
केस मोकळे सोडू नका: होळी खेळताना केस मोकळे सोडणे टाळा. केसांचा घट्ट अंबाडा किंवा वेणी घातल्याने रंगांचा संपर्क कमी येतो.
-
टोपी किंवा स्कार्फ: जर तुमचे केस खूप सेन्सिटिव्ह असतील, तर डोक्याला स्कार्फ किंवा टोपी बांधणे हा सर्वात उत्तम पर्याय आहे.
रंग खेळल्यानंतर काय करावे?
-
कोमट पाण्याचा वापर: रंग काढण्यासाठी कडक गरम पाणी वापरू नका, यामुळे त्वचा अधिक कोरडी होते. कोमट पाण्याचा वापर करा.
-
सौम्य क्लिन्झर: त्वचा जोरात घासून रंग काढण्याचा प्रयत्न करू नका. त्याऐवजी दही आणि बेसनाचे मिश्रण किंवा सौम्य बॉडी वॉश वापरा.
-
मॉइश्चरायझिंग: अंघोळीनंतर त्वचेला भरपूर मॉइश्चरायझर किंवा कोरफड जेल लावा.
शक्यतो नैसर्गिक रंग किंवा गुलालाचा वापर करा. जर रंग खेळताना त्वचेवर जळजळ होऊ लागली, तर त्वरित तो भाग स्वच्छ पाण्याने धुवा आणि जास्त त्रास होत असल्यास डॉक्टरांचा सल्ला घ्या.
