पुणे: पुण्यातील (Pune News) 23 वर्षीय तरुणाने दाखवलेल्या धैर्यामुळे सर्व स्थरातून त्याचे कौतुक होत आहे. फिल्मी स्टाईलने पाठलाग करून शस्त्राचा धाक दाखवणाऱ्या चार अट्टल चोरट्यांसमोर न डगमगता तरुणाने धैर्याने लढा दिला आहे. तरुण एका खासगी कार्यालयात कार्यरत असून, कामाच्या निमिताने त्याने बँकेतून 15 लाख रुपयांची रोकड काढली होती. ही मोठी रक्कम एका पिशवीत घेऊन तो आपल्या दुचाकीवरून कार्यालयाकडे निघाला होता. त्यावेळी चोरट्यांनी त्याला अडवले.
बँकेतून 15 लाख रुपयांची रोकड काढली आणि ती एका पिशवीत घेऊन तो कार्यालयाकडे निघाला होता. मात्र, तो बँकेतून बाहेर पडल्यापासूनच दोन चार संशयित त्याचा पाठलाग करत होते. वडगाव शेरी येथील ऑक्सिजन पार्कजवळ रस्ता काहीसा मोकळा असल्याचे पाहून चोरट्यांनी त्याला गाठले.
चोरट्यांनी धारदार शस्त्राचा धाक दाखवून तरुणाकडून पैशांची पिशवी हिसकावण्याचा प्रयत्न केला. मात्र या तरुणाने विलक्षण प्रसंगावधान राखले. त्याने एका चोरट्याला असा जोरात धक्का दिला की, दुचाकीवरील दोन चोरटे भररस्त्यात खाली कोसळले.
भररस्त्यात तरुणाने केलेल्या प्रतिकारामुळे परिसरातील नागरिक तातडीने मदतीला धावले. लोकांचा जमाव पाहताच चोरट्यांचे धाबे दणाणले आणि त्यांना 15 लाखांच्या रोकडीला हात न लावता रिकाम्या हाताने पळून जावे लागले. या प्रकरणी 4 जणांवर गुन्हा दाखल करण्यात आला आहे.
