पुणे : सोशल मीडियावर सध्या स्टेट बँक ऑफ इंडिया (SBI) बाबत एक मेसेज खूप व्हायरल होत आहे. यात 1 नोव्हेंबर 2026 पासून एसबीआयचे सर्व खाते बंद होणार असून पैसे काढण्यावरही बंदी घातली जाणार असल्याचा दावा केला जात आहे. मात्र, हा दावा पूर्णपणे खोटा आणि दिशाभूल करणारा आहे. बँकेने असा कोणताही निर्णय घेतलेला नाही आणि ग्राहकांनी असल्या अफवांवर अजिबात विश्वास ठेवू नये असे बँकेने स्पष्ट केले आहे.
काही दिवसांपूर्वी एसबीआयच्या 3,897 ग्राहकांची वैयक्तिक माहिती डार्क वेबवर लीक झाल्याची माहिती समोर आली होती. या प्रकारामुळे ग्राहकांमध्ये घबराट पसरली होती. यावर स्पष्टीकरण देताना बँकेने सांगितले की, या प्रकरणाची सखोल चौकशी CERT-In या अधिकृत संस्थेमार्फत केली जात आहे. बँकेच्या यंत्रणेने ग्राहकांचे पैसे पूर्णपणे सुरक्षित असल्याचे स्पष्ट केले असून सर्व बँकिंग व्यवहार नेहमीप्रमाणे सुरळीत सुरू आहेत.
बँकेने स्पष्ट केले आहे की, ग्राहकांची खाती बंद करण्याचा किंवा पैसे काढण्यास मज्जाव करण्याचा कोणताही निर्णय घेण्यात आलेला नाही. त्यामुळे कोणतीही खात्रीशीर माहिती नसलेले मेसेज पुढे पाठवू नका. कोणत्याही अफवेला बळी न पडता फक्त बँकेच्या अधिकृत चॅनेल्सवरूनच माहितीची खात्री करा.
