पुणे : सोशल मीडियावर सध्या महाराष्ट्रातील रेशन कार्डधारक महिलांबाबत एक मेसेज आणि व्हिडिओ जोरदार व्हायरल होत आहे. यामध्ये असा दावा केला जात आहे की, राज्यातील रेशन कार्डधारक महिलांना राज्य सरकारकडून 9,000 रुपयांचे विशेष अनुदान दिले जाणार आहे. याशिवाय, उपमुख्यमंत्री सुनेत्रा अजित पवार यांनी एका जाहीर कार्यक्रमात ही घोषणा केल्याचा दावाही त्या व्हिडिओमध्ये करण्यात आला आहे.
मात्र, हा दावा पूर्णपणे खोटा आणि दिशाभूल करणारा असल्याचे समोर आले आहे. महाराष्ट्र शासनाच्या माहिती आणि जनसंपर्क महासंचालनालयाने (DGIPR) या प्रकरणाची दखल घेत स्पष्टीकरण दिले आहे. सरकारने किंवा उपमुख्यमंत्री सुनेत्रा पवार यांनी अशी कोणतीही योजना जाहीर केलेली नाही, तसेच याबाबत कोणताही शासकीय निर्णय काढण्यात आलेला नाही.
तपासणीदरम्यान असे आढळून आले की, व्हायरल होत असलेला व्हिडिओ बनावट आहे. यामध्ये आर्टिफिशियल इंटेलिजन्स (AI) तंत्रज्ञानाचा वापर करून एआय-निर्मित दृश्ये आणि जुन्या भाषणांचे फुटेज एकत्र जोडून हा व्हिडिओ तयार करण्यात आला आहे. नागरिकांची फसवणूक करण्याच्या उद्देशाने हा डीपफेक व्हिडिओ एडिट करण्यात आला आहे.
त्यामुळे नागरिकांनी अशा कोणत्याही खोट्या अफवांवर किंवा सोशल मीडियावरील मेसेजवर अजिबात विश्वास ठेवू नये. तसेच, कोणतीही खात्री केल्याशिवाय असे मेसेज इतर लोकांना फॉरवर्ड करू नयेत, असे आवाहन प्रशासनाकडून करण्यात आले आहे. सरकारी योजनांविषयीची अधिकृत माहिती मिळवण्यासाठी केवळ शासनाच्या अधिकृत संकेतस्थळांचा किंवा विश्वसनीय वृत्तवाहिन्यांचाच वापर करावा.
