सागर जगदाळे
दौंड: दौंड तालुक्याच्या पूर्व भागातील काही हॉटेल आणि लॉज परिसरात रात्री उशिरापर्यंत सुरू असलेल्या संशयास्पद हालचालींमुळे परिसरात विविध चर्चांना उधाण आले आहे. हॉटेल व लॉजच्या नावाखाली काही ठिकाणी अनैतिक प्रकार सुरू असल्याची कुजबुज स्थानिक पातळीवर होत असून, याकडे प्रशासनाने गांभीर्याने लक्ष द्यावे, अशी मागणी व्यक्त होत आहे.
स्थानिकांच्या म्हणण्यानुसार, अनेक ठिकाणी दर्शनी भागात खानावळ किंवा मांसाहारी भोजनालयाचे फलक लावलेले दिसतात; मात्र पाठीमागील लॉज परिसरात रात्री उशिरापर्यंत अनोळखी व्यक्तींची वर्दळ सुरू असल्याचे दिसून येते. काही ठिकाणी रस्त्यालगत असलेल्या धाब्यांवर आणि लॉजवर उशिरापर्यंत गर्दी होत असल्याने, या ठिकाणी नेमके काय सुरू आहे, याबाबत परिसरात संशय व्यक्त केला जात आहे.
दरम्यान, या भागातील काही हॉटेल आणि भोजनालयांमध्ये अधिकृत वेळेनंतरही अवैध मद्यविक्री होत असल्याचीही चर्चा परिसरात ऐकायला मिळत आहे. उशिरापर्यंत सुरू राहणाऱ्या या प्रकारांमुळे मद्यधुंद अवस्थेत वाहन चालविणाऱ्यांची संख्या वाढत असून, त्यामुळे अपघातांचा धोका वाढत असल्याची चिंता काही नागरिकांकडून व्यक्त केली जात आहे.
या पार्श्वभूमीवर संबंधित ठिकाणांची तपासणी करून परिस्थितीची पडताळणी करावी, अशी अपेक्षा व्यक्त होत आहे. मद्यविक्रीसंबंधी नियमांची अंमलबजावणी करण्याची जबाबदारी महाराष्ट्र राज्य उत्पादन शुल्क विभाग तसेच स्थानिक पोलीस प्रशासनावर आहे. त्यामुळे या परिसरातील संशयास्पद हालचालींची सखोल चौकशी करून आवश्यक ती कायदेशीर कारवाई करावी, अशी मागणी नागरिकांकडून केली जात आहे.
प्रशासनाने या प्रकाराची वेळीच दखल घेऊन तपासणी केल्यास वस्तुस्थिती स्पष्ट होईल आणि परिसरातील नागरिकांमध्ये निर्माण झालेल्या चर्चांना पूर्णविराम मिळेल, असेही मत व्यक्त केले जात आहे.
