पुणे : आषाढी एकादशीच्या निमित्ताने पंढरपूर येथे विठ्ठलाच्या दर्शनासाठी गेलेल्या कुटुंबाच्या घरावर चोरट्यांनी डल्ला मारत रोकड, सोन्या-चांदीचे दागिने असा सुमारे ८२ हजार ७०० रुपयांचा ऐवज लंपास केला. एवढ्यावरच न थांबता शेजाऱ्याच्या घरासमोर उभी असलेली स्प्लेंडर मोटारसायकलही चोरून नेल्याने राहू (ता. दौंड) गावात खळबळ उडाली आहे.
यवत पोलिसांनी दिलेल्या माहितीनुसार, मच्छिंद्र किसन गजरे (वय ५४, रा. समतानगर, राहू) हे पत्नी, मुलगा आणि भावासह आषाढी एकादशीसाठी पंढरपूरला देवदर्शनासाठी गेले होते. त्यांच्या घराच्या सुरक्षेसाठी सीसीटीव्ही कॅमेरे बसविण्यात आले होते.२४ जुलै रोजी रात्री घर बंद असताना अज्ञात चोरट्यांनी घराच्या मुख्य दरवाजाचा कडी-कोयंडा तोडून आत प्रवेश केला. बेडरूममधील कपाटातील लॉकर फोडून ३० हजार रुपयांची रोकड, सोन्याच्या अंगठ्या, चैन, कर्णफुले, टॉप्स तसेच चांदीचे दागिने असा एकूण ८२ हजार ७०० रुपयांचा ऐवज चोरून नेला.
दरम्यान, गजरे यांच्या मुलाने पहाटे सीसीटीव्ही फुटेज तपासले असता घराचा दरवाजा उघडा असल्याचे दिसून आले. त्याने तात्काळ शेजारी आणि गावातील पोलीस पाटील यांना माहिती दिली. त्यांनी पाहणी केल्यानंतर घरफोडी झाल्याचे स्पष्ट झाले. त्यानंतर गजरे कुटुंब तातडीने पंढरपूरहून राहू येथे परतले.
चोरट्यांनी गजरे यांच्या भावाच्या घराचाही दरवाजा तोडून घरातील सामान अस्ताव्यस्त केले. मात्र, त्या घरातून कोणतीही चोरी झालेली नसल्याचे प्राथमिक पाहणीत आढळले. याच रात्री गावातील अविनाश चंदर नवले यांच्या घरासमोर हँडल लॉक करून उभी केलेली हिरो स्प्लेंडर प्लस (एमएच-४२ एझेड-७९६३) ही मोटारसायकलही अज्ञात चोरट्यांनी चोरून नेली.
या प्रकरणी अज्ञात चोरट्यांविरुद्ध यवत पोलीस ठाण्यात घरफोडी आणि वाहनचोरीचा गुन्हा दाखल करण्यात आला असून पोलीस हवालदार भोर पुढील तपास करीत आहेत. गावात एकाच रात्री घरफोडी आणि मोटारसायकल चोरीच्या घटना घडल्याने नागरिकांमध्ये भीतीचे वातावरण निर्माण झाले असून, चोरट्यांचा तातडीने शोध घेण्याची मागणी होत आहे.
