उरुळी कांचन, (पुणे): घरात कोणीही नसल्याची संधी साधत अज्ञात चोरट्यांनी बंद घराचा कडीकोयंडा तोडून सोन्या-चांदीच्या दागिन्यांसह तब्बल साडेचार लाखांचा ऐवज चोरून नेल्याची घटना घडली आहे. कोरेगाव मूळ (ता. हवेली) ग्रामपंचायत हद्दीतील इनामदारवस्ती परिसरात सोमवारी (ता. 10) सायंकाळी चार ते मंगळवारी (ता. 11) सायंकाळी सात वाजण्याच्या सुमारास ही घटना घडली आहे. (Uruli Kanchan Crime)
याप्रकरणी सुनिल लक्ष्मण कानकाटे (वय- 58, व्यवसाय शेती मुळ रा. इनामदार वस्ती, कोरेगाव मुऴ ता. हवेली, सध्या रा. आदित्य नगर हडपसर ता. हवेली) यांनी उरुळी कांचन पोलीस ठाण्यात फिर्याद दिली आहे. त्यानुसार उरुळी कांचन पोलीस ठाण्यात अज्ञात चोरट्यांच्या विरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, सुनिल कानकाटे हे हडपसर परिसरात राहत असून त्यांच्या आई या कोरेगाव मूळ हद्दीतील इनामदारवस्ती परिसरात राहतात. त्यांच्या आई सुभद्रा लक्ष्मण कानकाटे या आजारी असल्याने दोन दिवस रुग्णालयात दाखल केले होते. त्यांना रुग्णालयातून घरी आणले, यावेळी त्यांच्या बंद राहत्या घराचे कुलुप कोणातरी अज्ञात चोरट्याने कशाच्या तरी साहाय्याने तोडल्याचे दिसून आले.
घरात जाऊन पाहणी केली असता घरातील 50 हजार रुपये रोख रक्कम, सोन्याची पोत, सोन्याची अंगठी, कानातील कर्नफुले असे चार लाखांचे दागिने आढळून आले नाहीत. यावरून घरात चोरी झाल्याचे निष्पन्न झाले.
दरम्यान, याप्रकरणी अज्ञात चोरट्याने रोख रक्कम व सोन्याचे दागिने असा साडे चार लाखांचा मुद्देमाल चोरून नेल्याप्रकरणी उरुळी कांचन पोलीस ठाण्यात BNS 305(A),331(3),331(4) विविध कलमान्वये घरफोडीचा गुन्हा दाखल करण्यात आला आहे. तपास पोलीस उपनिरीक्षक प्रविण कांबळे करीत आहेत.
अनेक घरफोड्या व चोरीच्या घटनांचा अद्याप तपास नाहीच..
उरुळी कांचन पोलीस ठाण्याच्या हद्दीत अनेक दुचाकी व चारचाकी गाडी चोरीला गेल्या आहेत. तसेच पुणे-सोलापूर महामार्गावर मोठमोठे अपघात झाले आहेत. या अपघातात अनेकांना आपल्या जीवाशी मुकावे लागले आहे. या अपघातात अज्ञात वाहने धडक देऊन निघून गेली. मात्र, त्या वाहनांचा व चालकांचा अजूनही थांगपत्ता मिळू शकला नाही. तसेच अनेक घरफोड्या व वाहने चोरीच्या घटना अद्याप ‘अनडिटेक्ट’च आहेत.
