Pune Crime: पिंपरी चिंचवड पोलिसांनी ‘अवैध शस्त्र विरोधी अभियान’अंतर्गत मोठी कारवाई करत चार पिस्तूल आणि पाच जिवंत काडतुसे जप्त केली आहेत. ही कारवाई गुन्हे शाखा, युनिट-2 पिंपरी चिंचवड पोलिसांनी बोडकेवाडी फाटा, हिंजवडी माण रोड परिसरात केली. या प्रकरणी तिघा रेकॉर्डवरील सराईत आरोपींना ताब्यात घेण्यात आले आहे. (Latest Crime News)
मा. पोलीस आयुक्त श्री. विनय कुमार चौबे यांनी सर्व पोलीस ठाण्यांना आणि गुन्हे शाखांना “अवैध अग्निशस्त्र बाळगणाऱ्या व्यक्तींवर कठोर कारवाई करा” असे आदेश दिल्यानंतर ही पहिली मोठी कामगिरी नोंदवली गेली आहे.
गुन्हे शाखा युनिट-2 चे वरिष्ठ पोलीस निरीक्षक अरविंद पवार यांच्या नेतृत्वाखालील पथकाने ही कारवाई केली. पोशि अमर राणे यांना मिळालेल्या गुप्त माहितीच्या आधारे पथकाने सापळा रचला आणि आरोपींना शिताफीने पकडले.
अटक आरोपींची नावे समोर आली आहे. प्रविण गुंडेश्वर अंकुश (वय 21, रा. शनि नगर, कात्रज, पुणे) — घाटकोपर पोलीस ठाणे गुन्हा क्र. 24/2023 पोस्को कलमांतर्गत गुन्हा दाखल, विकी दिपक चव्हाण (वय 20, रा. हिंजवडी फेज 2) — हिंजवडी पोलीस ठाणे गुन्हा क्र. 1022/2025, आर्म्स अॅक्ट 3(25), रोहित फुलचंद भालशंकर (वय 22, रा. वडगाव बु.) — हिंजवडी, खडक व शिरुर पोलीस ठाण्यांत विविध गुन्ह्यांमध्ये वॉंटेड अशी आरोपींची ओळख पटली आहे.
या कारवाईतून मिळालेले 4 पिस्तूल व 5 जिवंत काडतुसे ताब्यात घेण्यात आली असून आरोपींवर संबंधित पोलीस ठाण्यांमध्ये आर्म्स अॅक्ट 3(25) अंतर्गत पुढील कारवाई सुरु आहे.
ही यशस्वी कारवाई पोलीस उप-आयुक्त (गुन्हे) डॉ. शिवाजी पवार, सहायक पोलीस आयुक्त विशाल हिरे, तसेच वरिष्ठ पोलीस निरीक्षक अरविंद पवार यांच्या मार्गदर्शनाखाली करण्यात आली. या पथकात पोउपनि मयुरेश साळुंखे, दिपक खरात, प्रविण दळे, नितीन ढोरजे आणि गुन्हे शाखेतील अन्य अधिकारी व कर्मचारी सहभागी होते. ही कारवाई पिंपरी चिंचवड पोलिसांच्या “आर्म ड्राईव्ह” मोहिमेतील मोठे यश मानले जात आहे.
