पुणे : पुण्यातील खराडी भागात एका हॉटेलमध्ये एका तरुणाचा संशयास्पद मृतदेह आढळल्याने खळबळ उडाली आहे. 35 ते 40 वयोगटातील या तरुणाने स्वतःवर गोळी झाडून आत्महत्या केल्याचा प्राथमिक संशय पोलिसांनी व्यक्त केला आहे. अक्षय कालिदास कांबळे (वय -26, रा. पूर्वरंग सोसायटी, पेरणे फाटा, पुणे-अहिल्यानगर रस्ता) असे मृत तरुणाचे नाव आहे.हा तरुण कोरेगाव भीमा येथील एका राष्ट्रीयीकृत बँकेत कंत्राटी कामगार म्हणून कार्यरत होता..
27 ऑक्टोबर रोजी हा तरुण खराडीतील तुळजाभवानीनगर येथील एका हॉटेलच्या तिसऱ्या मजल्यावरील खोलीत राहण्यासाठी आला होता. 29 ऑक्टोबरच्या दुपारपर्यंत तो खोलीबाहेर आला नाही. हॉटेल कर्मचाऱ्यांनी दरवाजा ठोठावूनही आतून काहीच प्रतिसाद न मिळाल्याने त्यांनी लगेच खराडी पोलिसांना याबाबत कळवले.
घटनेची माहिती मिळताच पोलिसांनी घटनास्थळी धाव घेतली. दरवाजा उघडून पाहिल्यावर तरुण रक्ताच्या थारोळ्यात पडलेला दिसला आणि त्याच्या हातात पिस्तूल होते. त्याच्या कपाळावर मधोमध गोळी लागल्याची खूण आढळली. पोलिसांनी तातडीने त्याच्या कुटुंबाशी संपर्क साधला. त्याच्या वडिलांनी आणि भावाने घटनास्थळी येऊन मृतदेहाची ओळख पटवली.
पोलीस तपासात मिळालेल्या माहितीनुसार, हा तरुण अविवाहित होता. गेल्या काही काळापासून त्याचे लग्न ठरत नसल्यामुळे तो मानसिक तणावात आणि नैराश्यात होता. याच नैराश्यातून त्याने हे टोकाचे पाऊल उचलल्याचा अंदाज वर्तवण्यात येत आहे.दरम्यान, आत्महत्येपूर्वी अक्षयने मित्रांना ‘आपली ही शेवटची भेट. पुढच्या जन्मी भेटू,’ असा संदेश पाठविल्याची माहिती पोलिसांनी दिली. प्राथमिक चौकशीत विवाह ठरत नसल्याने तो नैराश्यात असल्याचे समोर आले आहे. अक्षयकडे देशी बनावटीचे पिस्तूल कसे आले आणि ते त्याने कोणाकडून मिळविले, याचा पोलिस तपास करीत आहेत. या प्रकरणाचा पुढील तपास सहायक पोलिस निरीक्षक रवींद्र गोडसे करीत आहेत.
या प्रकरणी खराडी पोलीस ठाण्यात अकस्मात मृत्यूची नोंद करण्यात आली आहे. तरुणाकडे हे पिस्तूल नेमके कुठून आणि कसे आले, याचा शोध आता पोलीस घेत असून पुढील तपास सुरू आहे.
