पुणे : मुंबई आणि बंगळुरूदरम्यान धावणाऱ्या नवीन वंदे भारत स्लीपर एक्स्प्रेसमुळे पुणेकरांचा प्रवास अधिक सुखकर आणि वेगवान होणार आहे. नुकतीच या ट्रेनची मुंबई-पुणे मार्गावर यशस्वी चाचणी घेण्यात आली असून, 1 नोव्हेंबरला केंद्रीय रेल्वे राज्यमंत्री व्ही. सोमन्ना यांनी उद्घाटनाची घोषणा केली आहे. या नवीन रेल्वेमुळे प्रवाशांचे तब्बल 3 ते 6 तासांपर्यंतचे रस्ते किंवा रेल्वेचे तास वाचणार आहेत.
सध्या मुंबई ते बंगळुरू प्रवासासाठी सुमारे 22 तास लागतात. मात्र, वंदे भारत स्लीपर ट्रेनमुळे हा प्रवास अवघ्या 16 ते 18 तासांत पूर्ण होईल. तसेच पुण्याहून बंगळुरू गाठण्यासाठी आता 12 ते 15 तास लागू शकतात. रात्रीचा प्रवास करून सकाळी थेट इच्छित स्थळी पोहोचण्याचा उत्तम पर्याय आता प्रवाशांना मिळणार आहे.
ही ट्रेन बंगळुरूपासून सुटून अनंतपूर, गुंटकल, रायचूर, कलबुर्गी, सोलापूर, पुणे आणि कल्याण मार्गे मुंबईला पोहोचेल. पुण्यात थांबा मिळणार असल्याने पुणेकर प्रवाशांना याचा मोठा फायदा होणार आहे.
प्रस्तावित वेळापत्रकानुसार, मुंबईतून रात्री 10:30 वाजता निघणारी गाडी रात्री 1:50 वाजता पुण्यात येईल आणि दुसऱ्या दिवशी दुपारी 2:50 वाजता बंगळुरूला पोहचेल. याउलट, बंगळुरूहून रात्री 10 वाजता सुटणारी गाडी दुसऱ्या दिवशी सकाळी 10:35 वाजता पुण्यात आणि दुपारी 1:50 वाजता मुंबईत दाखल होईल. हे वेळापत्रक सध्या प्रस्तावित असून लवकरच अधिकृत वेळा जाहीर केली जाईल.
प्रवाशांच्या आरामासाठी या ट्रेनमध्ये एकूण 16 डबे असण्याची शक्यता आहे. यामध्ये 11 थर्ड एसी, 4 सेकंड एसी आणि 1 फर्स्ट क्लासचा डबा असेल. या संपूर्ण ट्रेनची प्रवासी क्षमता सुमारे 823 बर्थची असेल. लांब पल्ल्याचा प्रवास आरामदायक व्हावा यासाठी आधुनिक स्लीपर कोचची रचना करण्यात आली आहे. अद्याप तिकीट दर आणि आरक्षणाबद्दल रेल्वे प्रशासनाकडून कोणतीही अधिकृत घोषणा झालेली नाही.
