यवत (पुणे) : यवत पोलीस ठाण्याच्या हद्दीत असलेल्या भांडगाव गावच्या हद्दीतून तीन सराईत आरोपींकडून 3 अवैध गावठी पिस्तुल (कट्टे) आणि तब्बल 15 जिवंत काडतुसे जप्त केली आहेत. स्थानिक गुन्हे शाखा आणि यवत पोलिसांनी संयुक्तरीत्या ही कारवाई करीत तिन्ही आरोपींना अटक करण्यात आली आहे.
मंगेश शंकर मासोळे (वय -24), सूरज संजय शेलार (वय-26), रोहित प्रेमदास भुजवणे (वय 24, सर्व रा. यवत, ता. दौंड, जि. पुणे) असे अटक करण्यात आलेल्या आरोपींची नावे आहेत. त्यांच्या ताब्यातून पोलिसांनी गुन्ह्यात वापरलेली चारचाकी वाहनासह एकूण 5 लाख 37 हजार 500 रुपयांचा मुद्देमाल हस्तगत केला आहे.
पोलिसांनी दिलेल्या माहितीनुसार, स्थानिक गुन्हे शाखेचे तपास पथक यवत परिसरात मंगळवारी (ता. 07) पेट्रोलिंग (गस्त) घालत असताना, त्यांना गोपनीय बातमीदाराकडून माहिती मिळाली कि, भांडगाव परिसरात एक नंबर नसलेली पांढऱ्या रंगाची बलेनो कार संशयास्पदरीत्या फिरत असून, त्यामधील तीन इसमांकडे प्राणघातक गावठी पिस्तुल असल्याची माहिती मिळाली.
मिळालेल्या माहितीनुसार वरिष्ठ अधिकाऱ्यांच्या मार्गदर्शनाखाली स्थानिक गुन्हे शाखा आणि यवत पोलिसांच्या पथकाने भांडगाव येथील सोनाक्षी मंगल कार्यालयासमोर सापळा लावून संशयास्पद बलेनो कार शिताफीने अडवली. कार थांबवून पोलिसांनी मंगेश मासोळे, सूरज शेलार आणि रोहित भुजवणे या तिघांना खाली उतरवून त्यांची कसून चौकशी केली. पोलिसांनी त्यांची अंगझडती घेतली, तेव्हा तिन्ही आरोपींच्या कमरेला आणि खिशात बेकायदेशीररीत्या बाळगलेली एकूण 3 गावठी पिस्तुल आणि 15 जिवंत काडतुसे मिळून आली. पोलिसांनी तात्काळ सर्व शस्त्रे आणि विना नंबरची बलेनो कार पंचांसमक्ष जप्त केली.
दरम्यान, अटक करण्यात आलेल्या तिन्ही आरोपींना यवत पोलिसांच्या स्वाधीन करण्यात आले असून, त्यांच्याविरुद्ध यवत पोलीस ठाण्यात गुन्हा नोंदवण्यात आला आहे.
सदरची कामगिरी स्थानिक गुन्हे शाखेचे पोलीस निरीक्षक प्रमोद क्षीरसागर, यवतचे पोलीस निरीक्षक संतोष तासगावकर, पोलीस उपनिरीक्षक महेश डोंगरे, पोलीस अंमलदार सचिन घाडगे, आसिफ शेख, तुषार पंदारे, जनार्दन शेळके, संजू जाधव, राजू मोमीण, विकास पाटील, गुरुनाथ गायकवाड, सुभाष राऊत, योगेश नागरगोजे, विकास कापरे, आणि यवत ठाण्याचे संदीप देवकर, धीरज जाधव व मोहन भानवसे यांनी केली.
