पुणे : जिल्ह्याच्या हद्दीत येणाऱ्या ताम्हिणी घाटात एक अत्यंत धक्कादायक आणि दुर्दैवी घटना समोर आली आहे. रायगड जिल्ह्यातील माणगाव तालुक्यातील गोरेगाव येथील प्रसिद्ध उद्योजक श्रीनिवास बेंडखळे यांचा मृतदेह घाटातील खोल दरीत आढळून आला आहे. गेल्या 2 दिवसांपासून बेपत्ता असलेल्या या व्यावसायिकाचा अशा प्रकारे अंत झाल्याने माणगाव परिसरासह संपूर्ण रायगडच्या उद्योग क्षेत्रात हळहळ व्यक्त केली जात आहे.

पोलिसांनी दिलेल्या प्राथमिक माहितीनुसार, श्रीनिवास बेंडखळे हे मागील 2 दिवसांपासून घरातून बाहेर पडल्यानंतर परतले नव्हते. कुटुंबीयांनी त्यांचा सर्वत्र शोध घेतला, मात्र त्यांच्याबद्दल कोणतीही माहिती मिळत नव्हती. अखेर नातेवाईकांनी याप्रकरणी पोलिसांत तक्रार दाखल केली. पोलिसांनी तपासाची चक्रे वेगाने फिरवत तांत्रिक माहितीच्या आधारे त्यांच्या वाहनाचे शेवटचे लोकेशन तपासले. यावेळी त्यांच्या गाडीचे शेवटचे ठिकाण ताम्हिणी घाट परिसरात असल्याचे स्पष्ट झाले.
लोकेशनची माहिती मिळताच पोलिसांनी तातडीने घाट परिसरात शोधमोहीम राबवली. तपासणीदरम्यान पुणे हद्दीतील ताम्हिणी घाटात तब्बल 1200 फूट खोल दरीत त्यांचा भीषण अपघात झाल्याचे दिसून आले आणि तिथेच त्यांचा मृतदेह आढळला. दरी अतिशय खोल आणि भाग दुर्गम असल्यामुळे मृतदेह वर काढणे पोलिसांसाठी मोठे कठीण काम होते.

या कठीण परिस्थितीत एसव्हीआरएसएस आणि ‘शेलार मामा’ या बचाव पथकांनी रात्री उशिरापर्यंत शर्थीचे प्रयत्न करून खोल दरीतून बेंडखळे यांचा मृतदेह बाहेर काढला. सध्या पोलिसांनी हा मृतदेह उत्तरीय तपासणीसाठी (शवविच्छेदन) रुग्णालयात पाठवला आहे. हा प्रकार केवळ एक दुर्दैवी अपघात आहे की यामागे काही घातपात दडलेला आहे, या सर्व बाजूंनी पोलीस आता सखोल चौकशी करत आहेत.






