मुंबई : राज्याचे उपमुख्यमंत्री अजित पवार यांच्या 28 जानेवारी 2026 रोजी झालेल्या विमान अपघाताने राज्यभरात मोठी खळबळ उडाली होती. मुंबईहून बारामतीकडे निघालेल्या त्यांच्या खासगी विमानाचा बारामती विमानतळाजवळच भीषण अपघात झाला. विमान एका शेतात कोसळले असून दुर्घटनेनंतर सलग चार ते पाच स्फोट झाल्याची माहिती प्रत्यक्षदर्शींनी दिली. या घटनेचे काही सीसीटीव्ही फुटेजही समोर आले असून त्यामध्ये विमान कोसळतानाचे दृश्य स्पष्टपणे दिसत आहे.
या दुर्घटनेत अजित पवार यांचे निधन झाल्याने राज्यावर शोककळा पसरली. त्यांच्या आकस्मिक जाण्याने राजकीय वर्तुळात तसेच जनतेमध्ये मोठी हळहळ व्यक्त होत आहे. दरम्यान, या अपघाताची चौकशी सुरू असून विविध तांत्रिक आणि प्रशासकीय बाबींची तपासणी केली जात आहे.
पवार हे VSR कंपनीच्या लिअरजेट 45 विमानातून प्रवास करत होते. या पार्श्वभूमीवर डीजीसीए (DGCA) ने संबंधित कंपनीचा सविस्तर ऑडिट अहवाल जाहीर केला आहे. या अहवालात लिअरजेट 45 प्रकारातील एकूण 45 विमानांची तपासणी करण्यात आल्याचे नमूद करण्यात आले आहे.
संबंधित विमानाकडून नियमांचे उल्लंघन
तपासात संबंधित विमानाने नियमांचे उल्लंघन केल्याचे समोर आले आहे. तसेच देखभाल प्रक्रियेत त्रुटी आणि नियमांचे पालन न झाल्याचे गंभीर निरीक्षण नोंदविण्यात आले आहे. या पार्श्वभूमीवर DGCAने संबंधित लिअरजेट 45 विमानांचे उड्डाण तात्पुरते स्थगित करण्याचे आदेश दिले आहेत.
अपघातानंतर समोर आलेल्या या अहवालामुळे विमान वाहतूक क्षेत्रात मोठी खळबळ उडाली असून, तांत्रिक बिघाड आणि सुरक्षा प्रक्रियांबाबत गंभीर प्रश्न उपस्थित झाले आहेत. तपास यंत्रणा पुढील कारणमीमांसा करत असून अंतिम अहवालाकडे सर्वांचे लक्ष लागले आहे.
