Crime News: मुंबई : मुंबई येथील मीरा रोड परिसरातून एक अत्यंत संतापजनक घटना समोर आली आहे. एका 33 वर्षांच्या पित्याने आपल्याच 9 वर्षांच्या निष्पाप मुलाला गरम इस्त्रीचे चटके देऊन अमानुषपणे मारहाण (Inhuman beating) केली आहे. या धक्कादायक प्रकारामुळे संपूर्ण परिसरात खळबळ उडाली असून नागरिकांकडून तीव्र संताप व्यक्त केला जात आहे. याप्रकरणी भाईंदरमधील नवधर पोलीस ठाण्यात आरोपी पित्याविरोधात गुन्हा दाखल करण्यात आला आहे.
मिळालेल्या माहितीनुसार, संबंधित आरोपी व्यक्तीच्या पत्नीचे निधन झाले आहे. तो आपल्या लहान मुलासोबत मीरा रोड भागात वास्तव्यास आहे. या मुलाला त्याने शिक्षणासाठी मथुरा-वृंदावन येथील एका निवासी शाळेत म्हणजेच बोर्डिंगमध्ये ठेवले आहे. 20 डिसेंबर 2025 ते 6 फेब्रुवारी 2026 या कालावधीत हा मुलगा सुट्टीसाठी आपल्या घरी आला होता. याच काळात वडिलांनी त्याला अत्यंत क्रूर वागणूक दिली. मुलगा जेवण व्यवस्थित करत नाही किंवा अभ्यास करत नाही अशा अगदी शुल्लक कारणांवरून वडिलांनी त्याला राग भरला. इतकेच नाही तर रागाच्या भरात त्यांनी मुलाला घाणेरड्या शिव्या दिल्या आणि गरम इस्त्रीने त्याच्या शरीरावर चटके दिले.
सुट्टी संपल्यानंतर जेव्हा मुलगा पुन्हा आपल्या शाळेत परतला, तेव्हा तेथील शिक्षकांच्या लक्षात हा प्रकार आला. मुलाच्या अंगावरील जखमा पाहून शिक्षकांनी त्याला विश्वासात घेऊन विचारपूस केली. त्यावेळी घाबरलेल्या मुलाने वडिलांनी केलेली ही अमानुष कृत्य शिक्षकांना सांगितली. ही बाब समजताच शिक्षकांनी तातडीने मुलाच्या आजीशी संपर्क साधून त्यांना सर्व प्रकार सांगितला. त्यानंतर नातेवाईकांच्या मदतीने हा विषय पोलिसांपर्यंत पोहोचला. नवधर पोलिसांनी 23 फेब्रुवारी रोजी या प्रकरणाची गांभीर्याने दखल घेत मुलाची फिर्याद नोंदवून घेतली. स्वतःच्याच मुलाचा छळ करणाऱ्या या निर्दयी पित्याविरुद्ध आता कायदेशीर कारवाई सुरू करण्यात आली आहे.
